പ്രേമിക്കാൻ പ്രായം ഒരു പ്രശ്നമേയല്ല. ന്യൂയോർക്കിലെ ഹാറ്റി റിട്രോജ് മുത്തശ്ശി ഇതിന് ഉത്തമ ഉദാഹരമാണ്. 39 കാരനായ കാമുകനിൽ നിന്ന് അടുത്തിടെ പിരിഞ്ഞ 85 വയസുള്ള ഹാറ്റി റിട്രോജ്,​ ഇപ്പോൾ ഒരു ബോയ് ഫ്രണ്ടിനെ തിരയുകയാണ്. അമേരിക്കൻ ഡേറ്റിംഗ് ആപ്പായ ബംബിളിൽ അക്കൗണ്ട് തുടങ്ങി ഉടനെ ഒരു ബോയ്ഫ്രണ്ടിനെ കണ്ടെത്താനുള്ള ശ്രമത്തിലാണ് ഹാറ്റി മുത്തശ്ശി. യുവാക്കൾക്ക് മാത്രമേ മുത്തശ്ശിയുടെ ബോയ്ഫ്രണ്ടാകാൻ അവസരമുള്ളു.

ഹാറ്റി റിട്രോജ് വിവാഹ മോചിതയായത് നാൽപ്പത്തിയെട്ടാം വയസിലാണ്. മക്കളെ കോളേജിൽ ചേർക്കാൻ ഭർത്താവ് വേണ്ടത്ര പരിശ്രമിച്ചിട്ടില്ലെന്ന് കാര്യം പറഞ്ഞാണ് ഭർത്താവുമായി ഹാറ്റി പിരിഞ്ഞത്. അതിനുശേഷം, ചെറുപ്പക്കാരായ പുരുഷന്മാരുമായി മാത്രമേ ഹാറ്റി റിട്രോജ് ഡേറ്റിംഗിന് പോയിട്ടുള്ളു. മൂന്ന് പേരക്കുട്ടിയുടെ അമ്മൂമ്മയായ ഹാറ്റി റിട്രോജ് ഒരു നർത്തകിയായിരുന്നു. ഇപ്പോൾ ലൈഫ് കോച്ചായും എഴുത്തുകാരിയായിട്ടുമാണ് ഇവ‌ർ പ്രവർത്തിക്കുന്നത്. ഡേറ്റ് ചെയ്യാൻ 35 വയസ്സിന് താഴെയുള്ള പുരുഷന്മാരെ ആവശ്യമുണ്ടെന്ന് ഹാറ്റി പത്രപരസ്യവും കൊടുത്തിരുന്നു. ഈ പരസ്യത്തിന് മികച്ച പ്രതികരണമാണ് ലഭിച്ചതെന്നും ഹാറ്റി തന്നെ വെളിപ്പെടുത്തിയിട്ടുണ്ട്.

2018ൽ തന്റെ മുൻ കാമുകൻ ജോണിനൊപ്പം (39 വയസ്) ചാനൽ ഷോയിലും ഇവർ പങ്കെടുത്തിട്ടുണ്ട്. ഈ ടി.വി ഷോയ്ക്ക് ശേഷമാണ് ഹാറ്റിയും ജോണും തമ്മിലുള്ള ബന്ധം ബ്രേക്ക് അപ്പായത്. 'ഞാൻ ഇപ്പോൾ ആരുമായും ഡേറ്റിംഗിന് പോകാറില്ല. എന്റെ ചില സുഹൃത്തുക്കൾ ബംബിളിലൂടെ അവർക്കിഷ്ടപെട്ട ബോയ്ഫ്രണ്ടിനെ കണ്ടെത്തിയിട്ടുണ്ട്. അതുപോലെ ഞാൻ വീണ്ടും ഡേറ്റിംഗ് തുടങ്ങാന് പ്ലാൻ ചെയ്തിരിക്കുകയാണ്. എനിക്ക് ഇനിയും പ്രണയിക്കാൻ കഴിയും' എന്നാണ് ഹാറ്റി മാദ്ധ്യമങ്ങളോട് പറഞ്ഞത്.

ആഴ്ചയിൽ മൂന്നുതവണ പ്രശസ്ത ഡേറ്റിംഗ് ആപ്പായ ടിൻഡറിൽ ബോയ്ഫ്രണ്ടിനെ തിരയുമായിരുന്നുവെന്നും എന്നാൽ,​ ഇപ്പോൾ ടിൻഡർ തന്നെ ബ്ലോക്ക് ചെയ്തിരിക്കുകയാണെന്നും ഹാറ്റി റിട്രോജ് പറയുന്നു. ഇത് കാരണമാണ് ബംബിളിൽ ഒരു ബോയ്ഫ്രണ്ടിനെ തിരയാൻ ഹാറ്റി മുത്തശ്ശി തീരുമാനിച്ചത്.