തിരുവനന്തപുരം: മദ്യവില്‍പന ശാലകളിലെ തിരക്ക് കുറയ്ക്കാന്‍ പദ്ധതിയുമായി സര്‍ക്കാര്‍. മുൻകൂട്ടി മദ്യത്തിന്റെ പണമടച്ച് ബെവ്കോ കൗണ്ടറിലെത്തി മദ്യം വാങ്ങുന്നതിനുള്ള സൗകര്യമൊരുക്കുമെന്ന് മുഖ്യമന്ത്രി പിണറായി വിജയന്‍ വാർത്താ സമ്മേളനത്തില്‍ അറിയിച്ചു.
മദ്യവിൽപ്പന ശാലകൾക്ക് മുന്നിലെ വലിയ ക്യൂ വലിയ പ്രശ്നമായി മാറി. അത് ഒഴിവാക്കാൻ പ്രത്യേക കൗണ്ടർ ഏർപ്പെടുത്തുന്നുണ്ട്. തിരക്കുള്ള സ്ഥലങ്ങളിൽ കൗണ്ടറുകളുടെ എണ്ണം കൂട്ടും. ഈ കാണുന്ന തിരക്ക് ഒഴിവാക്കാൻ ആവശ്യമായ മറ്റ് ശാസ്ത്രീയ മാർഗങ്ങളും ആലോചിക്കുമെന്നും മുഖ്യമന്ത്രി വ്യക്തമാക്കി.
മദ്യവിൽപ്പന ശാലകൾക്ക് മുന്നിലെ തിരക്ക് വർദ്ധിക്കുന്നതിനെ ചൊല്ലി വ്യാപക പരാതികൾ ഉയർന്നതിനു പിന്നാലെയാണ് സർക്കാർ നടപടികളുമായി രംഗത്തെത്തിയിരിക്കുന്നത്. ഒരു വേള മദ്യശാലകൾക്ക് മുന്നിൽ കൊവിഡ് മാനദണ്ഡങ്ങൾ പാലിക്കുന്നില്ലെന്ന് ചൂണ്ടിക്കാട്ടി ഹെെക്കോടതി സർക്കാരിനെതിരെ രൂക്ഷവിമർശനം നടത്തിയിരുന്നു.