അർജന്റീനയുടെ വിജയം ആഘോഷിച്ച് എം എം മണി. 'നമ്മളെ അനാവശ്യമായി ചൊറിയാൻ വന്നാ നമ്മളങ്ങ് കേറി മാന്തും,അല്ല പിന്നെ' എന്നാണ് നീലപ്പടയുടെ വിജയത്തിന് പിന്നാലെ മണിയാശാൻ ഫേസ്ബുക്കിൽ കുറിച്ചിരിക്കുന്നത്. ഒപ്പം ടിവിയിൽ മത്സരം കാണുന്ന ഒരു ചിത്രവും അദ്ദേഹം പങ്കുവച്ചിട്ടുണ്ട്.
വിജയാഘോഷത്തിനിടയിൽ കടുത്ത ബ്രസീൽ ഫാനായ കടകംപള്ളി സുരേന്ദ്രനെ 'ട്രോളാനും' മണിയാശാൻ മറന്നില്ല. 'ആശാനെ, ചരിത്രമുറങ്ങുന്ന മാരക്കാനയിൽ ഞായറാഴ്ച പുതിയ ഫുട്‌ബോൾ ചരിത്രം കുറിക്കും...' എന്ന് മണിയെ ടാഗ് ചെയ്തുകൊണ്ട് കടകംപള്ളി നേരത്തെ ഒരു പോസ്റ്റ് ഇട്ടിരുന്നു.അർജന്റീന വിജയിച്ചതോടെ 'താങ്ക്യൂ, വാക്കുകൾ പൊന്നായി' എന്ന് എം എം മണി മറുപടി നൽകി.
അതേസമയം മെസിയെ അഭിനന്ദിച്ചുകൊണ്ട് കടകം പള്ളി ഫേസ്ബുക്കിൽ ഒരു പോസ്റ്റ് ഇട്ടിരുന്നു. അതോടൊപ്പം ബ്രസീൽ കൂടുതൽ കരുത്തോടെ തിരികെ വരുമെന്നും അദ്ദേഹം കുറിച്ചു.