ന്യൂഡൽഹി: രാജ്യത്ത് കഴിഞ്ഞ 24 മണിക്കൂറിനിടെ കൊവിഡ് സ്ഥിരീകരിച്ചത് 37,154 പേർക്കാണെന്ന് കേന്ദ്ര ആരോഗ്യമന്ത്രാലയം പുറത്തിറക്കിയ റിപ്പോർട്ടിൽ സൂചിപ്പിക്കുന്നു. 724 പേർ രോഗത്തിന് കീഴടങ്ങി. ഇതോടെ ആകെ രോഗം ബാധിച്ച് മരണമടഞ്ഞവർ 4,08764 ആയി. 3.08 കോടിയാണ് രാജ്യത്ത് ആകെ രോഗം ബാധിച്ചവരുടെ എണ്ണം. ഇതിൽ മൂന്ന് കോടിയോളം പേർ രോഗമുക്തി നേടി. 24 മണിക്കൂറിനിടെ 39,649 പേർ രോഗമുക്തി നേടിയതോടെയാണിത്.

രാജ്യത്തെ രോഗമുക്തി നിരക്ക് 97.22 ശതമാനമായി. 4.5 ലക്ഷമാണ് ആക്‌ടീവ് കേസ്‌ലോഡ്. കഴിഞ്ഞ 24 മണിക്കൂറിനിടെ 12.3 ലക്ഷം പേർക്ക് വാക്‌സിൻ നൽകി. ഇതോടെ ആകെ വാക്‌സിൻ സ്വീകരിച്ചവരുടെ എണ്ണം 37 കോടി കടന്നു.

സൈഡസ് കാഡിലയുടെ കൊവിഡ് വാക്സിൻ സൈക്കോവ് ഡി 12 വയസിന് മുകളിലുള‌ള കുട്ടികളിൽ അടിയന്തര ഉപയോഗത്തിന് സമർപ്പിച്ച അപേക്ഷ ഈയാഴ്‌ച തന്നെ വിദഗ്ദ്ധ സമിതി പരിഗണിച്ചേക്കും. അനുമതി ലഭിച്ചാൽ ഓഗസ്‌റ്റ്-സെപ്‌തംബർ മാസത്തോടെ വാക്‌സിൻ രാജ്യത്ത് വിതരണം ചെയ്യും.

വിവിധ സംസ്ഥാനങ്ങളിലെ കൊവിഡ് കണക്ക് നോക്കിയാൽ ഇന്നും മുന്നിൽ കേരളമാണ്. 12,220 രോഗികളാണ് സംസ്ഥാനത്ത് 24 മണിക്കൂറിനിടെ ഉണ്ടായത്. പിന്നിൽ 8535 കേസുകളുമായി മഹാരാഷ്‌ട്രയാണ്. മൂന്നാമത് 2775 കേസുകളുള‌ള തമിഴ്നാടാണ്.