ന്യൂഡൽഹി: 2021-22 അദ്ധ്യായന വർഷത്തേക്കുള്ള ബിരുദ പ്രവേശന നടപടികൾ സെപ്‌തംബർ മുപ്പതിനകം പൂർത്തിയാക്കണമെന്ന നിർദേശവുമായി യു ജി സി. ഒക്​ടോബർ ഒന്നിന്​ പുതിയ അദ്ധ്യായന വർഷം ആരംഭിക്കണമെന്നാണ് യു ജി സിയുടെ മാർ​​​ഗനിർദേശങ്ങളിൽ അറിയിച്ചിട്ടുള്ളത്. 2020-21 വർഷത്തെ അവസാന സെമസ്റ്റർ/ വാർഷിക പരീക്ഷകൾ കൊവിഡ്​ മാനദണ്ഡങ്ങൾ പാലിച്ച് നിർബന്ധമായും നടത്തണമെന്നും കമ്മിഷൻ വ്യക്തമാക്കി. ഓഗസ്റ്റിന് മുമ്പായാണ് ഈ പരീക്ഷകൾ നടത്തേണ്ടത്.

ഒന്നും രണ്ടും വർഷ വിദ്യാർത്ഥികൾക്ക്​ പരീക്ഷകളുണ്ടായിരിക്കില്ല. ഒന്നാംവർഷ ബിരുദ കോഴ്​സുകളിലെ ഒഴിവുള്ള സീറ്റുകളിലേക്ക്​ പ്രവേശനം നടത്തേണ്ട അവസാന തീയതി ഒക്​ടോബർ 31 ആണ്. അടിസ്ഥാന യോഗ്യത പരീക്ഷയുടെ സർട്ടിഫിക്കറ്റുകൾ ഡിസംബർ 31വരെ സമർപ്പിക്കാം. പ​ന്ത്രണ്ടാം ക്ലാസ്​ പരീക്ഷ ഫലം ജൂലായ് 31നകം പ്രസീദ്ധീകരിക്കുമെന്ന കണക്കുകൂട്ടലിലാണ് ഇത്. ഫലപ്രഖ്യാപനത്തിൽ മാറ്റമുണ്ടായാൽ ഒക്​ടോബർ 18ന്​ അദ്ധ്യായന വർഷം ആരംഭിക്കുന്ന തരത്തിൽ ക്രമീകരണം നടത്താനാണ് യു ജി സി സെക്രട്ടറി രജനീഷ്​ ജെയിൻ വൈസ്​ ചാൻസലർമാർക്കും കോളേജ്​ പ്രിൻസിപ്പൽമാർക്കും അയച്ച കത്തിൽ പറയുന്നത്.

ഓൺലൈനായോ ഓഫ്​ലൈനായോ രണ്ടും കൂടിയോ ക്ലാസ്​ ആരംഭിക്കാം. സി ബി എസ് ഇ, ഐ സി എസ് ഇ പരീക്ഷകളുടെ ഫലമടക്കം വന്നശേഷം മാത്രമേ ബിരുദ കോഴ്‌സുകളിലേക്ക് അഡ്‌മിഷൻ ആരംഭിക്കുന്നുള്ളു എന്ന കാര്യം ഉറപ്പാക്കണമെന്നും കത്തിൽ പറയുന്നു.