അഹമ്മദാബാദ്: ഗുജറാത്തിലെ കച്ചിൽ റിക്ടർ സ്കെയിലിൽ 3.9 രേഖപ്പെടുത്തിയ ഭൂചലനം അനുഭവപ്പെട്ടു. ആളപായമോ നാശനഷ്ടങ്ങളോ റിപ്പോർട്ട് ചെയ്തിട്ടില്ല.

ഇന്നലെ ഉച്ചയ്ക്ക് 12.43ഓടെയായിരുന്നു ഭൂചലനം. കച്ചിലെ ഭചാവുവിൽ നിന്ന് 19 കിലോമീറ്റർ അകലെ 14.2 കിലോമീറ്റർ ആഴത്തിലായാണ് ഭൂചലനത്തിന്റെ പ്രഭവകേന്ദ്രം. കഴിഞ്ഞ ദിവസം ഇവിടെ റിക്ടർ സ്കെയിലിൽ 1.6 രേഖപ്പെടുത്തിയ നേരിയ ഭൂചലനമുണ്ടായിരുന്നു.

രാജ്യത്തെ തന്നെ ഏറ്റവും ഭൂചലന സാദ്ധ്യതയുള്ള മേഖലകളിലൊന്നാണ് കച്ച്. 2001 ജനുവരി 26ന് കച്ചിലുണ്ടായ ഭൂകമ്പത്തിൽ ഇരുപതിനായിരത്തോളം പേർ മരിച്ചെന്നാണ് റിപ്പോർട്ട്.