ലണ്ടൻ: പെൻഷന് അർഹതയുണ്ടെന്ന് തിരിച്ചറിയാൻ വൈകിയത് മൂലം ബ്രിട്ടനിലെ ക്രോയ്ഡൺ സ്വദേശിനിയായ മാർഗരറ്റ്​ ബ്രാഡ്​ഷ എന്ന വയോധികയ്ക്ക് നഷ്ടപ്പെട്ടത് ലക്ഷങ്ങൾ. ക്രോയ്​ഡണിൽ 1921ൽ ജനിച്ച്​ കാനഡയിലേക്ക്​ കുടിയേറിയ മാർഗരറ്റ് 30 വർഷത്തോളം അവിടെയാണ്​ ജോലി ചെയ്തത്​. ഇപ്പോൾ ബ്രിട്ടനിലാണ് താമസിക്കുന്നതെങ്കിലും കാനഡയിൽ താമസിച്ചതിനാൽ 80 വയസ്സ്​ പൂർത്തിയാകുന്നതോടെ ലഭിക്കുന്ന പെൻഷന് അർഹതയില്ലെന്നാണ്​ കരുതിയത്​. 100 വയസ്സുകാരിയായ മാർഗരിറ്റിന് 80 വയസ്സ് മുതൽ പെൻഷൻ ലഭിച്ചിരുന്നെങ്കിൽ ഇന്ന് 75,000 ​പൗണ്ട്​ (77 ലക്ഷം രൂപ) സമ്പാദ്യമായി കൈയ്യിൽ ഉണ്ടാകുമായിരുന്നു.

എന്നാൽ, 80 തികഞ്ഞ അന്നുമുതൽ ഓരോ ആഴ്ചയും 82.45 പൗണ്ട്​ (8,461 രൂപ) സർക്കാർ പെൻഷനായി അനുവദിക്കും. ഇൻഷുറൻസ്​ തുക അടച്ചാലും ഇല്ലെങ്കിലും തുക ലഭിക്കും. കാനഡയിൽ ജോ​ലിയെടുത്ത കാലത്ത്​ മാർഗരറ്റ് ഇൻഷുറസ് അടച്ചിരുന്നില്ലായെങ്കിലും അത് പ്രശ്നമാകില്ലായിരുന്നു. മാർഗരറ്റിന്റെ​ 78കാരിയായ മകൾ ഹെലൻ കണ്ണിംഗ്​ഹാമാണ് വിവരം അമ്മയെ അറിയിച്ചത്.

ഒമ്പത്​ ചെറുമക്കളുടെ മുത്തശ്ശിയായ മാർഗരറ്റ്​ അപേക്ഷ നൽകിയതോടെ ഇപ്പോൾ പെൻഷൻ ലഭിച്ചുതുടങ്ങിയിട്ടുണ്ട്​. മറവിരോഗം അലട്ടുന്ന മാർഗരറ്റ് കാനഡയിലെ ചെറിയ പെൻഷൻ തുകയിലാണ്​ ജീവിക്കുന്നത്​. കുടിശ്ശികയിനത്തിൽ 4,000 പൗണ്ട്​ സർക്കാർ അനുവദിച്ചിരുന്നു. അവശേഷിച്ച തുക നഷ്​ടമാകും.