ടോക്യോ : ഷൂട്ടിംഗ് ഉൾപ്പടെ പ്രതീക്ഷ പുലർത്തിയ ഇനങ്ങളിൽ പിന്നോട്ടുപോയെങ്കിലും ടോക്യോയിലെ വനിതാ ബോക്സിംഗിൽ നിന്ന് ഇന്ത്യയ്ക്ക് ആശ്വാസവാർത്ത. പ്രീ ക്വാർട്ടറിൽ ജർമ്മനിയുടെ നാദീൻ അപെറ്റ്സിനെ 3-2ന് തോൽപ്പിച്ച ലവ്‌ലീന ബോർഗോഹയ്‌നാണ് ആവേശം പകർന്നത്. ക്വാർട്ടറിൽ വിജയിച്ചാൽ ലവ്‌ലീനയ്ക്ക് ഒരു മെഡൽ ഉറപ്പാക്കാനാകും. വെള്ളിയാഴ്ചയാണ് ലവ്‌ലീന ക്വാർട്ടറിൽ മത്സരിക്കാനിറങ്ങുന്നത്. വനിതാബോക്സിംഗിൽ ഇന്ന് പൂജാറാണിയും നാളെ എം.സി മേരികോമും പ്രീ ക്വാർട്ടറിൽ മത്സരിക്കുന്നുണ്ട്.

• കഴിഞ്ഞ ദിവസം ആസ്ട്രേലിയയോട് ദാരുണമായി തോറ്റിരുന്ന ഇന്ത്യൻ ഹോക്കി ടീം ഇന്നലെ സ്പെയ്നിനെ 3-0ത്തിന് തോൽപ്പിച്ച് ക്വാർട്ടർ പ്രതീക്ഷ വീണ്ടെടുത്തു.
• ബാഡ്മിന്റൺ ഡബിൾസിലെ മൂന്നാം മത്സരത്തിൽ ഇന്ത്യൻ ടീം ഇന്നലെ ബ്രിട്ടനെ തോൽപ്പിച്ചെങ്കിലും ക്വാർട്ടറിൽ കടക്കാനായില്ല.
• ടേബിൾ ടെന്നിസ് മൂന്നാം റൗണ്ടിൽ അചാന്ത ശരത് കമലും പുറത്തായി.
• ഷൂട്ടിംഗിൽ ഇന്നലെയും ഇന്ത്യൻ താരങ്ങൾ നിരാശപ്പെടുത്തുന്ന പ്രകടനം തുടർന്നു.