ന്യൂയോർക്ക്​: കൊവിഡ്​ മഹാമാരിക്കിടയിലും റെക്കാഡ്​ നേട്ടവുമായി ആ​പ്പിൾ. ജൂണിൽ അവസാനിച്ച സാമ്പത്തിക പാദത്തി​ൽ റെക്കാഡ്​ വരുമാനമാണ്​ കമ്പനി നേടിയത്​. 81.4 ബില്ല്യൺ ഡോളറാണ്​ ആപ്പി​ളിന്റെ ജൂൺ പാദത്തിലെ വരുമാനം. മുൻവർഷത്തെ അപേക്ഷിച്ച്​ 36 ശതമാനം അധികം. ആപ്പിളിന്റെ എല്ലാ ഉത്പ്പന്നങ്ങളിലും മികച്ച പ്രതികരണമാണ്​ ഈ പാദത്തിൽ ലഭ്യമായത്​. ആപ്പിൾ ഐഫോണായിരുന്നു ഇതിലെ പ്രധാന വരുമാനമാർഗം. കൂടാതെ ഐപാഡ്​, മാക്​, ആപ്പിൾ വാച്ച്​, ഹോംപോഡ്​ തുടങ്ങിയവയും കമ്പനിക്ക്​ കരുത്തേകി.

21.7 ബില്ല്യൺ ഡോളറാണ്​ ഈ സാമ്പത്തിക പാദത്തിലെ അറ്റാദായം. 2020ലെ ഈ പാദത്തേക്കാൾ 93ശതമാനം വർദ്ധനവാണിത്​. ഉത്പ്പന്നങ്ങളെ കൂടാതെ ആപ്പി​ൾ മ്യൂസിക്​, ഐക്ലൗഡ്​ തുടങ്ങിയവയുടെ സേവന വരുമാനവും ഇതിൽ ഉൾപ്പെടും.

ജൂൺ പാദത്തിലെ വരുമാന വർദ്ധനയിൽ ഇന്ത്യ പ്രധാന പങ്കുവഹിച്ചതായാണ്​ കമ്പനിയുടെ കണക്കുകൂട്ടൽ. ഇന്ത്യയെ കൂടാതെ ലാറ്റിനമേരിക്ക, വിയറ്റ്​നാം തുടങ്ങിയവയും വരുമാന വർദ്ധനയിൽ പ്രധാന പങ്കുവഹിച്ചതായി ആപ്പിൾ സി.ഇ.ഒ ടിം കുക്ക്​ പറഞ്ഞു. 5ജി ​ഫോണായ ഐഫോൺ 12 ആണ്​ ആപ്പി​ൾ ഉത്പ്പന്നങ്ങളിൽ ഉപഭോക്താക്കളെ ആകർഷിച്ചവയിൽ പ്രധാനം.