റാന്നി: പുതിയ പാലത്തിന്റെ നിർമ്മാണച്ചുമതല കിഫ്ബി പൂർണമായും ഏറ്റെടുത്തായി അഡ്വ. പ്രമോദ് നാരായൺ എം.എൽ.എ അറിയിച്ചു. പൊതു മരാമത്ത് പാലം വിഭാഗത്തിനായിരുന്നു പാലത്തിന്റെ നിർമ്മാണച്ചുമതല. എന്നാൽ അപ്രോച്ച് റോഡിന് സ്ഥലം ഏറ്റെടുക്കാനുണ്ടായ കാലതാമസം നിർമ്മാണം വൈകിപ്പിച്ചു. ഇപ്പോൾ പാലത്തിന്റെ നിർമ്മാണം ഏതാണ്ട് നിലച്ച അവസ്ഥയാണ്. ഇക്കാര്യം എം.എൽ.എ മന്ത്രി മുഹമ്മദ് റിയാസിന്റെ ശ്രദ്ധയിൽ കൊണ്ടുവന്നതിനെ തുടർന്ന് മന്ത്രി സ്ഥലം സന്ദർശിക്കുകയും കിഫ് ബിവഴി പാലത്തിന്റെ നിർമ്മാണച്ചുമതല നേരിട്ട് നടത്തുവാൻ നടപടി സ്വീകരിക്കുമെന്ന് ഉറപ്പ് നൽകി. പുനലൂർ മൂവാറ്റുപുഴയിൽ പമ്പാ നദിക്ക് കുറുകെയുള്ള വലിയ പാലത്തിന് സമാന്തരമായി പെരുമ്പുഴ ഉപാസന കടവുകളെ ബന്ധിപ്പിച്ചാണ് പുതിയ പാലം നിർമ്മിക്കുവാൻ കിഫ്ബി വഴി ഫണ്ട് അനുവദിച്ചത്. 26 കോടി രൂപ വകയിരുത്തിയ പാലത്തിന്റെ നിർമ്മാണച്ചുമതല പൊതുമരാമത്ത് വകുപ്പിനായിരുന്നു. റാന്നി കരയിലെ രാമപുരം ബ്ലോക്ക് പടി റോഡ് ഏറ്റെടുത്ത് ഉന്നത നിലവാരത്തിൽ പുനരുദ്ധരിച്ചാണ് അപ്രോച്ച് റോഡ് വിഭാവനം ചെയ്തത്. ഇതോടെ റാന്നി ബ്ലോക്കുപടി മുതൽ ഇട്ടിയപ്പാറ മിനർവ പടി വരെ സംസ്ഥാന പാതയ്ക്ക് സമാന്തര പാത വരും. ഇട്ടിയപ്പാറ, മാമുക്ക്, പെരുമ്പുഴ ടൗണുകളിലെ ഗതാഗതക്കുരുക്കിന് ശാശ്വത പരിഹാരമാകും. പാലത്തിന്റെ ഇരുകരകളിലേയും നദിയിലേയും തൂണുകളുടെ നിർമ്മാണം അന്തിമ ഘട്ടത്തിലാണ്. സ്ഥലം ഏറ്റെടുക്കൽ നടപടി വേഗതയിലാക്കി പാലം നിർമ്മാണം എത്രയും വേഗം പൂർത്തിയാക്കുമെന്ന് എം.എൽ.എ ഉറപ്പു നൽകി.