ഓച്ചിറ : രണ്ടാം ലോക്ക് ഡൗൺ കാലത്ത് സന്നദ്ധ പ്രവർത്തകരായ കൊവിഡ് പോരാളികൾക്ക് നാൽപ്പത് ദിവസം തുടർച്ചയായി പ്രഭാത ഭക്ഷണം വിതരണം ചെയ്ത കരുനാഗപ്പള്ളിയിലെ നൻമ വണ്ടി പ്രവർത്തകരെ ഓച്ചിറ പൊലീസ് ആദരിച്ചു. എല്ലാദിവസവും പുതിയ കാവ് നെഞ്ചുരോഗ ആശുപത്രിയിലെ ക്ഷയരോഗ ബാധിതർക്കും കൂട്ടിരിപ്പുകാർക്കും കൂടാതെ ഓച്ചിറ ബസ് സ്റ്റാൻഡ് പരിസരത്ത് തമ്പടിച്ച് താമസിക്കുന്നവരുൾപ്പടെ എഴുപത്തിയഞ്ചോളം പേർക്ക് പ്രഭാത ഭക്ഷണം നൽകി വരുന്ന സന്നദ്ധ സംഘടനയാണ് നൻമ വണ്ടി. ഓച്ചിറ പൊലീസ് സ്റ്റേഷനിൽ നടന്ന ചടങ്ങിൽ എസ്. എച്ച്.ഒ ആർ. പ്രകാശിൽ നിന്ന് നൻമ വണ്ടി പ്രവർത്തകരായ ബിജു മുഹമ്മദ്, തൊടിയൂർ സന്തോഷ്, ഹാരിസ് ഹാരി, അബ്ദുൽ ഷുക്കൂർ എന്നിവർ ആദരവ് ഏറ്റുവാങ്ങി.