കൊല്ലം: കുറ്റിച്ചിറയിലെ സ്വകാര്യ ധനകാര്യ സ്ഥാപനത്തിൽ നിന്ന് മുക്കുപണ്ടം പണയപ്പെടുത്തി 50,000 രൂപ തട്ടിയെടുത്ത കേസിൽ നാലുപേർ പിടിയിലായി. ഇടുക്കി ചെറുതോണി ഇടുക്കി ഡാം തോടിനടുത്തുള്ള മുസ്ലിം പള്ളിക്ക് സമീപം കുന്നത്ത് വീട്ടിൽ അഖിൽ ബിനു (20, അപ്പു), ഇരട്ടക്കുളങ്ങര ഗണപതി ക്ഷേത്രത്തിന് സമീപം വാടകയ്ക്ക് താമസിക്കുന്ന കിളികൊല്ലൂർ കല്ലുംതാഴം കൃഷ്ണ മന്ദിരത്തിൽ വിഷ്ണു (26), കല്ലുംതാഴം ഇരട്ടക്കുളങ്ങര ക്ഷേത്രത്തിന് സമീപം എസ്.ആർ ഭവനിൽ സിദ്ധാർഥ് (26), കൊറ്റങ്കര പേരൂർ വയലിൽ വീട്ടിൽ വിനീത് (25) എന്നിവരെയാണ് കിളികൊല്ലൂർ പൊലീസ് അറസ്റ്റ് ചെയ്തത്.
ഈ മാസം അഞ്ചിന് കുറ്റിച്ചിറയിലെ സ്ഥാപനത്തിലെത്തിയ പ്രതികൾ ആശുപത്രി ആവശ്യത്തിനാണെന്ന് പറഞ്ഞ് വ്യാജ തിരിച്ചറിയൽ കാർഡ് കാണിച്ച് മുക്കുപണ്ടം പണയം വച്ച് 50,000 രൂപ കൈപ്പറ്റി. സ്ഥാപന ഉടമ മാല ഉരച്ചുനോക്കുന്നതിനിടെ യുവാക്കൾ കടന്നുകളഞ്ഞു. തട്ടിപ്പ് തിരിച്ചറിഞ്ഞ ഉടമ പരാതി നൽകിയതിനെ തുടർന്ന് കിളികൊല്ലൂർ പൊലീസ് നടത്തിയ അന്വേഷണത്തിലാണ് പ്രതികൾ പിടിയിലായത്.

അഖിൽ ബിനു താമസിച്ചിരുന്ന നഗരത്തിലെ ലോഡ്ജ് മുറിയിൽ നിന്ന് നിരവധി മുക്കുപണ്ടങ്ങൾ കണ്ടെടുത്തു. വിവിധ ജില്ലകളിൽ സമാനമായ നിരവധി കേസുകളിലെ പ്രതിയും ജയിൽ ശിക്ഷ അനുഭവിച്ചിട്ടുള്ളയാളുമാണ് അഖിലെന്ന് പൊലീസ് പറഞ്ഞു. ഇവരുടെ നേതൃത്വത്തിൽ ജില്ലയിൽ മറ്റിടങ്ങളിലും തട്ടിപ്പ് നടത്തിയതായി സംശയമുണ്ട്.

കിളികൊല്ലൂർ എസ്.എച്ച്.ഒ കെ. വിനോദ്, എസ്.ഐമാരായ ശ്രീനാഥ്, താഹാക്കോയ, മധു, ജാനസ്, ജയൻ സക്കറിയ, സന്തോഷ്, എ.എസ്.ഐമാരായ സന്തോഷ്, സുനിൽ എന്നിവരുടെ സംഘമാണ് പ്രതികളെ പിടികൂടിയത്.