കരുനാഗപ്പള്ളി: ആലപ്പുഴ ആകാശവാണി നിലയത്തിന്റെ ദൈനംദിന പ്രവർത്തനതിന്‌ ആവശ്യമായ ഫണ്ട്‌ അനുവാദിക്കാത്ത പ്രസാർ ഭാരതിയുടെ നടപടിയിൽ എ.എം. ആരിഫ്‌ എം.പി ശക്തമായ പ്രതിഷേധം അറിയിച്ചു. എല്ലാ വർഷവും 146 ലക്ഷം രൂപ അനുവദിക്കുന്ന സ്ഥാനത്ത്‌ ഈ വർഷം കേവലം 50 ലക്ഷം രൂപ മാത്രമാണ്‌ അനുവദിച്ചത്‌. ഇതു വൈദ്യുത ചാർജിന് പോലും തികയില്ല. ഡീസൽ ജനറേറ്റർ നന്നാക്കുന്നതിനുള്ള ഫണ്ട്‌ അനുവദിക്കാത്തതിനാൽ വൈദ്യുതി മുടങ്ങിയാൽ എഫ്‌.എം പ്രക്ഷേപണം മുടങ്ങുന്ന അവസ്ഥയുമുണ്ട്‌. നിലവിലെ ട്രാൻസിറ്റർ മാറ്റി അത്യാധുനിക ഡി.ആർ.എം. ട്രാൻസിസ്റ്റർ സ്ഥാപിക്കാനുള്ള നടപടികളിലും പുരോഗതി ഉണ്ടായിട്ടില്ല. ഈ വിഷയങ്ങൾ കത്തിലൂടെയും ഫോണിലൂടെയും സി.ഇ.ഒ എസ്‌.എസ്‌.വെമ്പട്ടിയുടെ ശ്രദ്ധയിൽപ്പെടുത്തിയെന്ന് എ.എം.ആരിഫ് എം.പി അറിയിച്ചു.