കൊട്ടിയം: പൂച്ച കുറുകെ ചാടിയതിനെ തുടർന്ന് സ്കൂട്ടർ അപകടത്തിൽപ്പെട്ട് വീട്ടമ്മ മരിച്ചു. വാളത്തുംഗൽ ഇളവെയിൽ തൊടിയിൽ ഉദയഭാനുവിന്റെ ഭാര്യ സുധയാണ് (48)​ മരിച്ചത്. ഇന്നലെ രാവിലെ 8 ഓടെ ഇരവിപുരം വാളത്തുംഗൽ ആക്കോലിൽ ജംഗ്ഷന് സമീപമായിരുന്നു അപകടം.

കശുഅണ്ടി തൊഴിലാളിയായ സുധ ജോലിക്കായി ആലുംമൂട്ടിലേക്ക് മരുമകനായ സജിനൊപ്പം സ്കൂട്ടറിൽ പോകുമ്പോഴായിരുന്നു അപകടം. പെട്ടെന്ന് ബ്രേക്ക് പിടിച്ചപ്പോൾ സുധ പിന്നിലേയ്ക്ക് തലയിടിച്ച് വീഴുകയായിരുന്നു. പരിക്കേറ്റ സുധയെ സജിനും നാട്ടുകാരും ചേർന്ന് കൂട്ടിക്കടയിലെ സ്വകാര്യ ആശുപത്രിയിൽ എത്തിച്ചെങ്കിലും മരണം സംഭവിച്ചു. മൃതദേഹം ജില്ലാ ആശുപത്രി മോർച്ചറിയിൽ. ഇരവിപുരം പൊലീസ് കേസെടുത്തു. മക്കൾ: മനു, മീനു.