 വിദ്യാർത്ഥികളും പൊലീസും തമ്മിൽ ഉന്തും തള്ളും

കൊല്ലം: കൊവിഡ്​ പശ്ചാത്തലത്തിൽ സാങ്കേതിക സർവകലാശാല പരീക്ഷ ഓൺലൈനായി നടത്തണമെന്ന് ആവശ്യപ്പെട്ട് കെ.എസ്​.യുവിന്റെ നേതൃത്വത്തിൽ ടി.കെ.എം എൻജിനിയറിംഗ് കോളേജിൽ നടന്ന സമരം സംഘർഷത്തിൽ കലാശിച്ചു. ഓഫ് ലൈൻ പരീക്ഷ തടസപ്പെടുത്താൻ ശ്രമിച്ച വിദ്യാർത്ഥികളെ പൊലീസ് ബലം പ്രയോഗിച്ച് നീക്കാൻ ശ്രമിച്ചത് ഉന്തിനും തള്ളിനും ഇടയാക്കി.

ബി.ടെക്​ മൂന്നാം സെമസ്​റ്റർ പരീക്ഷയാണ്​ ഇന്നലെ നടന്നത്​. പരീക്ഷ ഒരുകാരണവശാലും മാറ്റില്ലെന്ന്​ സർവകലാശാല അധികൃതർ ബുധനാഴ്​ച രാത്രിയിൽ ഇറക്കിയ സർക്കുലറിൽ വ്യക്തമാക്കിയിരുന്നു. ഇതിന്റെ അടിസ്ഥാനത്തിൽ, പരീക്ഷ എഴുതാനെത്തുന്നവരെ തടയരുതെന്നും കോളേജ്​ അധികൃതർ സമരാഹ്വാനം നടത്തിയവരുമായുള്ള ചർച്ചയിൽ ആവശ്യപ്പെട്ടിരുന്നു. വ്യാഴാഴ്​ച രാവിലെ നിരവധി വിദ്യാർത്ഥികൾ പരീക്ഷയ്ക്കായി കോളേജിൽ എത്തിയെങ്കിലും ഗേറ്റിൽ കെ.എസ്​.യു പ്രവർത്തകർ തടഞ്ഞു. തുടർന്ന്​ കോളേജ്​ അധികൃതർ പൊലീസിനെ വിവരമറിച്ചു. പരീക്ഷ എഴുതാനെത്തുന്നവരെ തടയരുതെന്ന പൊലീസ്​ നിർദേശത്തെ തുടർന്ന്​ വിദ്യാർത്ഥിക​ളെ കോളേജിൽ പ്രവേശിക്കാൻ അനുവദിച്ചു. എന്നാൽ കൺട്രോളർ ഒാഫ്​ എക്​സാമിനേഷന്റെ മുറി സമരാനുകൂലികൾ ഉപരോധിച്ചു.

ഇത് അദ്ധ്യാപ​കരുമായി വാക്കേറ്റമുണ്ടാക്കി. തുടർന്ന് പൊലീസെത്തി സമരക്കാരെ ബലം പ്രയോഗിച്ച്​ പുറത്താക്കി. പരീക്ഷ തടസമില്ലാതെ നടന്നു.

ഇതിനിടയിൽ​ തങ്ങൾക്ക്​ ക്രൂരമായി മർദ്ദനമേറ്റെന്ന്​ കെ.എസ്​.യു പ്രവർത്തകർ ആരോപിച്ചു. പരിക്കേറ്റ രണ്ടാംവർഷ പ്രൊഡക്ഷൻ വിദ്യാർത്ഥി ജസീൽ മുഹമ്മദ്​ സ്വകാര്യ ആശുപത്രിയിൽ ചികിത്സതേടിയതായി കെ.എസ്.യു നേതാക്കൾ പറഞ്ഞു. ഉച്ചയ്ക്ക്​ ശേഷം എം.സി.എ, എം.ടെക്​ പരീക്ഷകളും സുഗമമായി നടന്നു. ലാത്തിച്ചാർജ്​ നടന്നില്ലെന്നും പ്രതിരോധിച്ച സമര​ക്കാരെ സ്ഥലത്ത്​ നിന്ന്​ നീക്കുകയാണ്​ ഉണ്ടായതെന്നും കിളികൊല്ലൂർ പൊലീസ്​ അറിയിച്ചു.​ അൻപതോളം വിദ്യാർത്ഥികൾക്കെതിരെ പൊലീസ്​ കേസെടുത്തു.

പരീക്ഷ എഴുതിയത് 40 വിദ്യാർത്ഥികൾ മാത്രം

സമരവും സംഘർഷവും കാരണമുള്ള അനിശ്ചിതത്തിനൊടുവിൽ ടി.കെ.എം എൻജിനിയറിംഗ്​ കോളേജിൽ ബി.ടെക്​ മൂന്നാം സെമസ്​റ്റർ പരീക്ഷ നടത്തിയപ്പോൾ എഴുതിയത്​ 40 വിദ്യാർത്ഥികൾ മാത്രം. പുറത്തുനിന്നുള്ള വിദ്യാർത്ഥികൾ ഉൾപ്പെടെ 240 പേരാണ്​ ഇവിടെ സെന്റർ തിരഞ്ഞെടുത്തിരുന്നത്​. സമരം കാരണം പല വിദ്യാർത്ഥികളും മടങ്ങിപ്പോയി. കാമ്പസിൽ വിദ്യാർത്ഥികൾക്ക്​ നേരെ ലാത്തിച്ചാർജുണ്ടായെന്ന പ്രചാരണം വാസ്​തവവിരുദ്ധമാണ്​. സർവകലാശാലയ്ക്ക്​ കീഴിലെ കോളേജ്​ എന്ന നിലയിൽ ടി.കെ.എമ്മിന്​ മാത്രം പരീക്ഷ നടത്താതിരിക്കാനാകില്ല. മികച്ച വിജയശതമാനവുമായി മുന്നിൽ നിൽക്കുന്ന ടി.കെ.എം എൻജിനീയറിംഗ്​ കോളജി​ന്റെ നേട്ടങ്ങൾ അട്ടിമറിക്കാനുള്ള ശ്രമമാണ് നടന്നതെന്നും കോളേജ് അധികൃതർ പറഞ്ഞു.