ചാവക്കാട്: മത്സ്യ ബന്ധനത്തിനിടെ രണ്ട് തൊഴിലാളികൾക്ക് പരിക്കേറ്റു. ഇന്നലെ രാവിലെ ആറരയോടെ ചേറ്റുവ പടിഞ്ഞാറ് വല അടിക്കുമ്പോൾ വള്ളത്തിന്റെ പലകകൾ ഇളകി തെറിച്ചാണ് രണ്ട് തൊഴിലാളികൾക്ക് പരിക്കേറ്റത്. എടക്കഴിയൂർ സ്വദേശിയുടെ ഉടമസ്ഥതയിലുള്ള 'പുളിങ്ങുന്നത്ത്'വള്ളത്തിലെ തൊഴിലാളികളായ തിരുവത്ര പുത്തൻകടപ്പുറം ചെങ്കോട്ട സ്വദേശി അലുങ്ങൽ റാഫി(35), കൊൽക്കത്ത സ്വദേശി ന്യൂട്ടൻ (26) എന്നിവർക്കാണ് പരിക്കേറ്റത്. റാഫിയുടെ വലത് കൈക്കും ന്യൂട്ടന്റെ ഇടതുകൈ വിരലിനുമാണ് പരിക്ക്. ഇവർ മുതുവട്ടൂർ രാജ ആശുപത്രിയിൽ ചികിത്സയിലാണ്. ഇരുപതോളം തൊഴിലാളികളാണ് വള്ളത്തിലുണ്ടായിരുന്നത്. പരിക്കേറ്റവരെ മത്സ്യ തൊഴിലാളി യൂണിയൻ (സി.ഐ.ടി.യു) ചാവക്കാട് ഡിവിഷൻ സെക്രട്ടറി കെ.എം.അലി, മത്സ്യതൊഴിലാളി സഹകരണ സംഘം പ്രസിഡന്റ് ടി.എം.ഹനീഫ, യൂണിയൻ നേതാക്കളായ പി.പി.നാരായണൻ, കെ.ബാദുഷ എന്നിവർ സന്ദർശിച്ചു.