തൃശൂർ: മിൽമ ചെയർമാനും പ്രമുഖ കോൺഗ്രസ് നേതാവുമായ പി.എ. ബാലൻ (74 ) അന്തരിച്ചു. ഒരു മാസം മുമ്പ് മസ്തിഷ്‌കത്തിലുണ്ടായ രക്തസ്രാവത്തെ തുടർന്ന് എറണാകുളത്തും തൃശൂരിലുമുള്ള സ്വകാര്യ ആശുപത്രികളിൽ ചികിത്സയിലായിരുന്നു. ഇന്നലെ രാവിലെ പത്തരയോടെയായിരുന്നു അന്ത്യം.
കേരള കോ-ഓപ്പറേറ്റീവ് മിൽക്ക് മാർക്കറ്റിംഗ് ഫെഡറേഷൻ സംസ്ഥാന ചെയർമാനായ അദ്ദേഹം, സഹകരണ മേഖലയിൽ 45 വർഷത്തിലേറെ പ്രവർത്തിച്ചു. 30 വർഷത്തിലേറെ മിൽമയുടെ ഡയറക്ടർ ബോർഡ് അംഗവും ആറ് വർഷം മിൽമയുടെ എറണാകുളം മേഖലാ യൂണിയൻ ചെയർമാനുമായിരുന്നു.
മിൽമയുടെ സ്ഥാപക നേതാക്കളിലൊരാളായ അദ്ദേഹം, 1980 ൽ മിൽമയുടെ രൂപീകരണത്തിന് മുൻപ് തന്നെ ക്ഷീരകർഷകരുടെ ഉന്നമനത്തിനായി രൂപീകരിച്ച സ്‌റ്റേറ്റ് മിൽക്ക് സൊസൈറ്റീസ് അസോസിയേഷൻ ഭാരവാഹിയായിരുന്നു. വലിയ സഹകരണ പ്രസ്ഥാനമായി മിൽമയെ വളർത്തുന്നതിൽ നിർണ്ണായകപങ്ക് വഹിച്ചിട്ടുണ്ട്.
കർഷക കോൺഗ്രസ് സംസ്ഥാന വൈസ് പ്രസിഡന്റ് ആയിരുന്ന അദ്ദേഹം രാഷ്ട്രീയത്തിന് അതീതമായി ക്ഷീരകർഷകരുടെയും മിൽമയുടെയും വളർച്ചയ്ക്കായി നിലകൊണ്ടു.
അവിണിശ്ശേരി ക്ഷീരോത്പാദക സഹകരണ സംഘം പ്രസിഡന്റ്, അഖില കേരള എഴുത്തച്ഛൻ സമാജം സംസ്ഥാന വൈസ് പ്രസിഡന്റ്, സംസ്ഥാന സഹകരണ യൂണിയൻ അംഗം എന്നീ നിലകളിൽ പ്രവർത്തിച്ചു.
2013 ൽ ഇന്ത്യൻ ഇക്കണോമിക് ആൻഡ് റിസർച്ച് അസോസിയേഷന്റെ ലീഡിംഗ് മിൽക്ക് ഏന്റർപ്രണർ പുരസ്‌കാരവും 2008 ലെ മികച്ച സഹകാരിക്കുള്ള പുരസ്‌കാരവും ലഭിച്ചിട്ടുണ്ട്.
അവിണിശ്ശേരി സ്വദേശിയാണ്. പെരിഞ്ചേരി എ.എൽ.പി സ്‌കൂൾ അദ്ധ്യാപകനായിരുന്നു. ഭാര്യ: വാസന്തി ദേവി (റിട്ട. കെ.എസ്.എഫ്.ഇ ഉദ്യോഗസ്ഥ). ടെക്‌നോപാർക്ക് മുൻ ഡയറക്ടർ ബോർഡ് അംഗവും ഐ. ടി വ്യവസായിയുമായ രഞ്ജിത്ത് ബാലൻ, രശ്മി ഷാജി എന്നിവർ മക്കളാണ്. മരുമക്കൾ: ഷാജി ബാലകൃഷ്ണൻ (ദുബായ് ), മഞ്ജു രഞ്ജിത്ത് (സിസ്റ്റം അനലിസ്റ്റ്, യു.എസ്.ടി ഗ്ലോബൽ, ഇൻഫോപാർക്ക് ). സംസ്‌കാരം നടത്തി.