തൃശൂർ: ജില്ലയിലെ തദ്ദേശ സ്വയംഭരണ സ്ഥാപനങ്ങളിലെ പദ്ധതി പ്രവർത്തനങ്ങൾ സമയബന്ധിതമായി പൂർത്തിയാക്കാൻ ജില്ലാ ആസൂത്രണ സമിതി തദ്ദേശ സ്ഥാപനങ്ങളോട് നിർദ്ദേശിച്ചു. ജില്ലാ ആസൂത്രണ ഭവൻ ഹാളിൽ നടന്ന അഡ്‌ഹോക്ക് ജില്ലാ ആസൂത്രണ സമിതി യോഗത്തിലാണ് നിർദേശം.
വിവിധ പദ്ധതികൾ ഏറ്റെടുത്ത് നടത്തുന്നതോടൊപ്പം തൊഴിൽ നൈപുണ്യ വകുപ്പിന്റെ സ്‌കിൽ രജിസ്ട്രി മൊബൈൽ ആപ്പിന്റെ പ്രവർത്തനവും ആഗസ്റ്റ് മാസത്തിൽ നടത്താനും നിർദ്ദേശം നൽകി. ഇടനിലക്കാരില്ലാതെ തൊഴിൽ എന്ന പദ്ധതിയിൽ 42 സേവന പ്രവർത്തനങ്ങളാണ് ഉൾപ്പെടുത്തിയത്. പദ്ധതി വിജയകരമായി നടപ്പാക്കാൻ ജില്ലാതല ഓഫീസറെയും നിയോഗിച്ചിട്ടുണ്ട്.

ശുചിപൂർണ ജില്ലാപദ്ധതിയുടെ ഭാഗമായി മെറ്റീരിയൽ കളക്ഷൻ ഫെസിലിറ്റി (എം.സി.എഫ്) സംവിധാനം നിലവിലില്ലാത്തതും ഹരിതകർമ സേന പൂർണമായി പ്രവർത്തിക്കാത്തതുമായ തദ്ദേശ സ്വയംഭരണ സ്ഥാപനങ്ങളോട് ഇവയ്ക്കായി സ്ഥലലഭ്യത ഉറപ്പുവരുത്താനും പ്രവർത്തനം നിർബന്ധമാക്കാനും നിർദ്ദേശിച്ചു.

കരുവന്നൂർ നദീതട പ്ലാനിന് അംഗീകാരം

ജില്ലാ പഞ്ചായത്തിന്റെയും 33 ഗ്രാമ പഞ്ചായത്തുകളുടെയും സഹകരണത്തോടെ നടപ്പിലാക്കുന്ന ബഹുവർഷ പദ്ധതിയായ കരുവന്നൂർ നദീതട പ്ലാനിനും അംഗീകാരം നൽകി. പദ്ധതിയ്ക്ക് 20 കോടി വകയിരുത്തിയിട്ടുണ്ട്. വെണ്ണൂർതുറ നവീകരണം, കൊടകര പഞ്ചായത്ത് സ്ത്രീ ശാക്തീകരണ പദ്ധതി എന്നിവയും ഇതിൽ ഉൾപ്പെടുത്തും.

ഗുരുവായൂർ നഗരസഭ 2021- 22 ലെ പുതുക്കിയ അയ്യങ്കാളി തൊഴിലുറപ്പ് പദ്ധതി പ്രകാരം തയ്യാറാക്കിയിരിക്കുന്ന 17.73 കോടി രൂപയുടെ തൊഴിൽ ബഡ്ജറ്റ്, ആക്ഷൻ പ്ലാൻ എന്നിവ അംഗീകരിച്ചു. പദ്ധതിയിൽ ഉൾപ്പെടുത്തി 365627 തൊഴിൽ ദിനങ്ങൾക്കായി 903 പദ്ധതികളാണ് സമർപ്പിച്ചത്.

കളക്ടർ ഹരിത വി. കുമാർ, അസിസ്റ്റന്റ് കളക്ടർ സൂഫിയാൻ മുഹമ്മദ്, ജില്ലാ വികസന കമ്മീഷണർ അരുൺ കെ. വിജയൻ, ജില്ലാ പ്ലാനിംഗ് ഓഫീസർ എൻ.കെ ശ്രീകല തുടങ്ങിയവരും തദ്ദേശ സ്ഥാപന ഉദ്യോഗസ്ഥരും പങ്കെടുത്തു.

2017-18 മുതൽ ജില്ലയിൽ നടപ്പിലാക്കി വരുന്ന 'ജലരക്ഷ ജീവരക്ഷ' പദ്ധതിയുടെ തുടർഘട്ടമെന്നോണം ജില്ലയിലെ വിശദാംശങ്ങൾ ശേഖരിച്ചു കഴിഞ്ഞു. ഇതിന്റെ ഭാഗമായി ജില്ലയിലെ എല്ലാ കുളങ്ങളും നവീകരിക്കുകയും പുനരുദ്ധീകരിക്കുകയും ചെയ്യും.

പി.കെ. ഡേവിസ് (ജില്ലാ പഞ്ചായത്ത് പ്രസിഡന്റ്, ജില്ലാ ആസൂത്രണ സമിതി ചെയർമാൻ)