കൈതി എന്ന ബ്ലോക്ബസ്റ്ററിന് ശേഷം കമൽഹാസനെ കേന്ദ്ര കഥാപാത്രമാക്കി ലോകേഷ് കനകരാജ് സംവിധാനം ചെയ്യുന്ന വിക്രം എന്ന ചിത്രത്തിൽ കമലഹാസനും നരേനും ഒന്നിക്കുന്നു. കൈതിയിലെ ബിജോയ് എന്ന പൊലീസ് ഓഫീസറെ നരേൻ ഗംഭീരമാക്കിയിരുന്നു. വിക്രം സിനിമയുടെ ടീസർ പുറത്തിറങ്ങിയ സമയത്ത് ലോകേഷിനെ അഭിനന്ദനം അറിയിക്കാൻ വിളിച്ചപ്പോഴാണ് തനിക്കും ഒരു വേഷമുണ്ടെന്ന് അറിയിക്കുന്നതെന്ന് നരേൻ വെളിപ്പെടുത്തി. ആ സമയം ദുബായിയിൽ ഒരു തമിഴ് സിനിമയുടെ ഷൂട്ടിംഗിലായിരുന്നു. തിരിച്ചെത്തിയതിന് ശേഷം തിരക്കഥയുടെ പ്രസക്തഭാഗങ്ങൾ വിവരിക്കുകയും ചെയ്തിരുന്നു. പ്രധാനകഥാപാത്രത്തെയാണ് ഞാൻ അവതരിപ്പിക്കുന്നതെന്ന് അപ്പോഴാണ് മനസ്സിലായതെന്ന് നരേൻ പറയുന്നു.

ചെറുപ്പം മുതലേ കമലഹാസനോട് കടുത്ത ആരാധന ആയിരുന്നു. അതുകൊണ്ട് അദ്ദേഹത്തോടൊപ്പം അഭിനയിക്കുകയെന്നത് എന്നുമൊരു സ്വപ്നമായിരുന്നു. അത് സാക്ഷാത്കരിക്കാൻ പോകുകയാണ്, അത് ലോകേഷിന്റെ സംവിധാനത്തിൽ കൂടി ആകുമ്പോൾ അതിലേറെ സന്തോഷമുണ്ട്...നരേൻതുടരുന്നു.

വിക്രം എന്ന ചിത്രം എല്ലാ രീതിയിലും കൈതിക്ക് മുകളിൽ നിൽക്കുന്ന സിനിമയായിരിക്കും. തന്റെ ഭാഗങ്ങൾ ഓഗസ്റ്റിൽ ഷൂട്ട് ചെയ്യുമെന്നും പുതിയ ലുക്കിൽ അല്ലെങ്കിലും കൈതിയിൽ നിന്ന് തികച്ചും വ്യത്യസ്തമായ ലുക്കിലായിരിക്കും എത്തുകയെന്നും നരേൻ പറയുന്നു. കൈതിയിലെ പൊലീസ് വേഷത്തിന് ശേഷം തമിഴിൽ നിന്ന് നിരവധി പൊലീസ് വേഷങ്ങൾ നരേന് ലഭിച്ചിരുന്നു. എന്നാൽ ഒരേതരം വേഷങ്ങൾ ചെയ്യാൻ താല്പര്യമില്ലെന്ന് പറഞ്ഞ് അദ്ദേഹം അതെല്ലാം നിരസിക്കുകയായിരുന്നു.