തിരുവനന്തപുരം: നെയ്യാറ്റിൻകര ജനറൽ ആശുപത്രിയിൽ കൊവിഡ് പ്രതിരോധ പ്രവർത്തനങ്ങളിൽ ആരോഗ്യപ്രവർത്തകരെ സഹായിക്കുന്നതിനായി രൂപീകരിച്ച കൊവിഡ് ബ്രിഗേഡ് സന്നദ്ധ സേന അൻപത് ദിവസം പൂർത്തിയാക്കുന്നു. കെ. ആൻസലൻ എം.എൽ.എയുടെ നേതൃത്വത്തിലാണ് സന്നദ്ധ സേന രൂപീകരിച്ചത്. കൊവിഡ് പ്രതിരോധ പ്രവർത്തനങ്ങൾ മികച്ച രീതിയിൽ മുന്നോട്ടുപോകുന്നതായി ഇതുമായി ബന്ധപ്പെട്ടു നടത്തിയ വാർത്താസമ്മേളനത്തിൽ കെ. ആൻസലൻ എം.എൽ.എ പറഞ്ഞു. രാവിലെ 8 മുതൽ 2 മണി വരെയും 2 മണി മുതൽ വൈകിട്ട് 8 മണി വരെയും 2 ഷിഫ്റ്റ് ആയാണ് സന്നദ്ധ സേനാംഗങ്ങൾ പ്രവർത്തിക്കുന്നത്.

കൂട്ടിരുപ്പുകാർ അനുവദനീയമല്ലാത്തതിനാൽ രോഗിക്ക് വേണ്ട എല്ലാ സഹായവും ഈ സന്നദ്ധ സേനയാണ് ചെയ്യുന്നത്. കൊവിഡ് രൂക്ഷമായ സമയത്ത് ഓക്സിജൻ സിലിണ്ടറുകൾ വാർഡുകളിൽ എത്തിക്കുന്നതിനും വണ്ടികളിൽ ലോഡ് അൺലോഡ് ചെയ്യുന്നതിനും സന്നദ്ധ പ്രവർത്തകർ തയ്യാറായി. ഇതിനോടകം 525 തൊഴിൽ ദിനങ്ങൾ പൂർത്തിയാക്കി. യാതൊരു പ്രതിഫലവും സ്വീകരിക്കാതെയാണ് അംഗങ്ങൾ പ്രവർത്തിക്കുന്നത്. രോഗികൾക്ക് യാത്രാസൗകര്യമൊരുക്കാനായി ദിവസവും രണ്ടു വാഹനങ്ങളും ഒരുക്കിയിട്ടുണ്ട്. അർഹരായവർക്ക് സൗജന്യമായാണ് യാത്രാസൗകര്യം നൽകുന്നത്.