നെടുമങ്ങാട്: നഗരസഭാ പ്രദേശത്ത് ഡി.വൈ.എഫ്.ഐയുടെ നേതൃത്വത്തിലുള്ള കൊവിഡ് സന്നദ്ധ സേന പ്രവർത്തനം സജീവമാക്കിയതായി മേഖലാ ഭാരവാഹികൾ അറിയിച്ചു. 39 വാർഡുകളിലുമുള്ള കൊവിഡ് രോഗികൾക്കും ക്വാറന്റൈനിൽ കഴിയുന്നവർക്കും മരുന്നും ഭക്ഷണവും ഉൾപ്പടെ മറ്റു അവശ്യ സാധനങ്ങൾ എത്തിക്കൽ, അണുനശീകരണപ്രവർത്തനങ്ങൾ, കൊവിഡ് ചികിത്സാവാർഡ് സജ്ജീകരിക്കൽ, കൊവിഡ് ബാധിച്ച് മരണമടഞ്ഞവരുടെ മൃതദേഹങ്ങൾ സംസ്കരിക്കൽ തുടങ്ങിയ പ്രവർത്തനങ്ങളാണ് ഏറ്റെടുത്ത് ചെയ്യുന്നത്. അടിയന്തര സാഹചര്യങ്ങളിൽ രോഗികളെ ആശുപത്രിയിൽ എത്തിക്കുന്നതിന് 'സ്‌നേഹവണ്ടി' എന്ന പേരിൽ ഡി.വൈ.എഫ്.ഐയുടെ ആംബുലൻസ് സേവനവും മറ്റ് വാഹനങ്ങളുടെ സൗകര്യവും ക്രമീകരിച്ചിട്ടുണ്ട്. ബുദ്ധിമുട്ടനുഭവിക്കുന്നവർക്ക് ഭക്ഷ്യക്കിറ്റുകൾ യൂണിറ്റ് പ്രദേശങ്ങളിൽ വിതരണം ചെയ്ത് വരികയാണ്. ഡി.വൈ.എഫ്.ഐ നെടുമങ്ങാട് ബ്ലോക്ക് ട്രഷറർ എം. മനീഷ് , പഴകുറ്റി മേഖലാ പ്രസിഡന്റ് ബി. വിഷ്ണു , പഴകുറ്റി മേഖലാ എക്സിക്യൂട്ടീവ് അംഗം ജെ.യു. ജിഷ്ണു , പഴകുറ്റി മേഖലാ കമ്മിറ്റി അംഗം ബിനുകുമാർ , ഡി.വൈ.എഫ്.ഐ സന്നദ്ധ സേന നഗരസഭ തല കോർഡിനേറ്റർ എ.എസ്. ഹരി എന്നിവരുടെ നേതൃത്വത്തിലാണ് സേവന പ്രവർത്തനങ്ങൾ മുന്നേറുന്നത്.