തിരുവനന്തപുരം: ട്രയൽ ഓൺലൈൻ ക്ലാസിൽ വിദ്യാർത്ഥികളുമായി ആശയവിനിമയം നടത്തി പൊതുവിദ്യാഭ്യാസ മന്ത്രി വി. ശിവൻകുട്ടി. ജിസ്യൂട്ട് ഫോർ എഡ്യൂക്കേഷൻ ഓൺലൈൻ പ്ലാറ്റ്‌ഫോമുപയോഗിച്ച് ക്ലാസുകൾ നടത്തുന്ന പിരപ്പൻകോട് വി.എച്ച്.എസ്.ഇ സ്‌കൂളിലെ രസതന്ത്ര ക്ലാസിനിടെയാണ് പൊതുവിദ്യാഭ്യാസ വകുപ്പ് മന്ത്രി വിദ്യാർത്ഥികൾക്ക് മുമ്പിൽ ഓൺലൈനായെത്തിയത്.
രസതന്ത്ര അദ്ധ്യാപകൻ സുജിത് .എസ് പ്ലസ്ടു വിദ്യാർത്ഥികൾക്കായി എടുത്ത ക്ലാസുകൾ മന്ത്രി നിരീക്ഷിച്ചു. പ്ലാറ്റ്‌ഫോം ഏറെ പ്രയോജനപ്രദമാണെന്ന് കുട്ടികൾ മന്ത്രിയോട് പറഞ്ഞു. ട്രയലിന്റെ തുടർച്ചയായി കൂടുതൽ സ്‌കൂളുകളിൽ ഓൺലൈൻ ക്ലാസുകൾ പരീക്ഷണാടിസ്ഥാനത്തിൽ നടത്തിയശേഷം ഏറ്റവും ഫലപ്രദമായ സൗകര്യം കുട്ടികൾക്കായി ഏർപ്പെടുത്തുമെന്നും മുഴുവൻ കുട്ടികൾക്കും ഡിജിറ്റൽ ഉപകരണങ്ങൾ ഉറപ്പാക്കിയശേഷം മാത്രമേ ഓൺലൈൻ ക്ലാസുകൾ ആരംഭിക്കൂവെന്നും മന്ത്രി വ്യക്തമാക്കി. പൊതുവിദ്യാഭ്യാസ ഡയറക്ടർ കെ. ജീവൻ ബാബു, കൈറ്റ് സി.ഇ.ഒ കെ.അൻവർ സാദത്ത്, വി.എച്ച്.എസ്.ഇ ഉപ ഡയറക്ടർ അനിൽകുമാർ തുടങ്ങിയവരും ക്ലാസുകൾ നിരീക്ഷിച്ചു.