തിരുവനന്തപുരം: പി.എസ്.സി പത്താംക്ലാസ് നിലവാരത്തിലുള്ള തസ്തികകളുടെ രണ്ടാംഘട്ട മുഖ്യ പരീക്ഷകൾ ഒക്‌ടോബർ 23, 30 തീയതികളിലും ഡിസംബർ 1 മുതൽ 11 വരെയും നടക്കും. പ്രാഥമിക പരീക്ഷയിലുണ്ടായ 192 തസ്തികകളെ വിവിധ വിഭാഗങ്ങളായി തരംതിരിച്ചാണ് പരീക്ഷ നടത്തുന്നത്. അഞ്ച് ഘട്ടങ്ങളിലായി നടന്ന പ്രാഥമിക പരീക്ഷയിൽ വിജയിക്കുന്നവർക്കാണ് മുഖ്യപരീക്ഷകൾ നടത്തുന്നത്.

പ്രാഥമിക പരീക്ഷകളുടെ അടിസ്ഥാനത്തിൽ ഓരോ തസ്തികയിലേക്കും പ്രത്യേകം ഷോർട്ട് ലിസ്റ്റുകൾ സെപ്തംബറിൽ പ്രസിദ്ധീകരിക്കും. രണ്ടാംഘട്ട പരീക്ഷയ്ക്ക് പ്രത്യേകമായി സ്ഥിരീകരണം നൽകേണ്ട. ഓരോ തസ്തികയ്ക്കും പുതുക്കിയ സിലബസും നിശ്ചയിച്ചിട്ടുണ്ട്. വെബ്‌സൈറ്റിലെ പരീക്ഷാക്കലണ്ടറിൽ നൽകിയിട്ടുള്ള സിലബസ് ലിങ്കിൽ നിന്ന് ഉദ്യോഗാർത്ഥികൾക്ക് ഇത് ലഭ്യമാകും. പരീക്ഷയുടെ സമയം, പരീക്ഷാകേന്ദ്രം എന്നിവ സംബന്ധിച്ച വിവരം അഡ്മിഷൻ ടിക്കറ്റിൽ ലഭിക്കും. മൂല്യനിർണയവും സമയബന്ധിതമായി പൂർത്തീകരിച്ചിട്ടുണ്ട്. ആദ്യമായാണ് പി.എസ്.സി കൂടുതൽ തസ്തികകൾക്ക് ദ്വിതലത്തിലുള്ള പരീക്ഷകൾ നടത്തുന്നത്.