തിരുവനന്തപുരം: ദൈവദാസൻ ആർച്ച് ബിഷപ് മാർ ഈവാനിയോസ് മെത്രാപോലീത്തയുടെ ഓർമ്മപെരുനാളിനോട് അനുബന്ധിച്ചുള്ള പരിപാടികൾ ഇന്ന് സമാപിക്കും. സമാപനദിവസമായ ഇന്ന് രാവിലെ 8ന് നടക്കുന്ന പെരുനാൾ കുർബാനയ്ക്ക് മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ മുഖ്യകാർമ്മികത്വം വഹിക്കും. ആർച്ച് ബിഷപ് തോമസ് മാർ കൂറിലോസ്, ബിഷപ്പുമാരായ ജോഷ്വാ മാർ ഇഗ്നാത്തിയോസ്, യൂഹാനോൻ മാർ ക്രിസോസ്റ്റം, സാമുവൽ മാർ ഐറേനിയോസ്, തോമസ് മാർ അന്തോണിയോസ്, വിൻസന്റ് മാർ പൗലോസ്, തോമസ് മാർ യൗസേബിയൂസ്, യൂഹാനോൻ മാർ തിയഡോഷ്യസ്, ഗീവർഗീസ് മാർ മക്കാറിയോസ്, എന്നിവർ സഹകാർമ്മികരായിരിക്കും. തുടർന്ന് കബറിടത്തിൽ അനുസ്മരണ ശുശ്രൂഷകൾ നടക്കും. ആയിരങ്ങൾ പങ്കെടുത്തിരുന്ന മെഴുകുതിരി പ്രദക്ഷിണത്തിൽ ഇന്നലെ പങ്കെടുത്തത് കർദിനാൾ മാർ ബസേലിയോസ് ക്ലീമിസ് കാതോലിക്ക ബാവായുടെ നേതൃത്വത്തിൽ 10 മെത്രാപ്പോലീത്താമാർ മാത്രമാണ്. ഇന്നലെ സന്ധ്യയോടെ പട്ടം സെന്റ് മേരീസ് കത്തീഡ്രലിന് ചുറ്റുമാണ് പ്രതീകാത്മക പ്രദക്ഷിണം നടന്നത്. ജൂലായ് ഒന്ന് മുതൽ തിരുവനന്തപുരം പട്ടം സെന്റ് മേരീസ് കത്തീഡ്രലിൽ നടന്ന പെരുനാളിന് വിവിധ ദിവസങ്ങളിൽ സഭയിലെ മെത്രാപ്പോലീത്താമാരും വികാരി ജനറൽമാരും നേതൃത്വം നൽകി.