തിരുവനന്തപുരം: ടെക്‌നോ പാർക്ക് കൂടി ഉൾപ്പെടുത്തി തിരുവനന്തപുരം ലൈറ്റ് മെട്രോയ്ക്ക് വിശദ പദ്ധതി റിപ്പോർട്ട് ഉടൻ തയ്യാറാക്കാൻ മുഖ്യമന്ത്രി പിണറായി വിജയൻ നിർദ്ദേശിച്ചു. തിരുവനന്തപുരം ഔട്ടർ റിംഗ് റോഡിന്റെ വിശദ റിപ്പോർട്ട് ഓക്ടോബറോടെ കിറ്റ്‌കോ തയ്യാറാക്കുമെന്നും പറഞ്ഞു. സർക്കാരിന്റെ മുൻഗണനാ പദ്ധതികളുടെ അവലോകന യോഗത്തിൽ അദ്ധ്യക്ഷത വഹിക്കുകയായിരുന്നു മുഖ്യമന്ത്രി.

കൊച്ചി മെട്രോയുടെ കാക്കനാട് എക്സ്റ്റെൻഷന് ഭൂമി ഏറ്റെടുക്കൽ ആഗസ്റ്റ് 31നകം പൂർത്തിയാക്കും. മെട്രോ പദ്ധതിയുടെ റെയിൽവേയുമായി ബന്ധപ്പെട്ട കാര്യങ്ങൾ ചെന്നൈയിലെ റെയിൽവേ ചീഫ് ജനറൽ മാനേജരുമായി ഉടൻ ചർച്ചചെയ്യും. കൊച്ചി വാട്ടർ മെട്രോയുടെ ട്രയൽ റൺ ജൂലായ് 23ന് നടത്തും. ആഗസ്റ്റ് 15ഓടെ ഉദ്ഘാടനം നടത്താനാകും. ശബരിമല വിമാനത്താവളവുമായി ബന്ധപ്പെട്ട സ്‌കെച്ചും ലൊക്കേഷൻ മാപ്പും കേന്ദ്ര വ്യോമയാന മന്ത്രാലയത്തിന് കൈമാറി. തത്വത്തിലുള്ള അംഗീകാരം ഉടൻ ലഭിക്കുമെന്നാണ് പ്രതീക്ഷ. കൊച്ചിൻ അർബൻ ഡെവലപ്‌മെന്റ് ആൻഡ് വാട്ടർ ട്രാൻസ്‌പോർട്ട് പദ്ധതിയുടെ ഭൂമി ഏറ്റെടുക്കലും പുനരധിവാസവും ത്വരിതപ്പെടുത്താനും നിർദ്ദേശം നൽകി.
കണ്ണൂർ സിറ്റി റോഡ് ഇംപ്രൂമെന്റ് പദ്ധതി ഉടൻ ആരംഭിക്കും. ഭൂമി ഏറ്റെടുക്കലും പുനരധിവാസവും ഉൾപ്പെടെ നടത്തി ദേശീയ ജലപാതയുടെ പ്രവർത്തനം വേഗത്തിലാക്കും. യോഗത്തിൽ ചീഫ് സെക്രട്ടറി ഡോ. വി.പി.ജോയി, വകുപ്പു സെക്രട്ടറിമാർ തുടങ്ങിയവർ പങ്കെടുത്തു.