മാലിക് റിലീസായതിന് പിന്നാലെ ചിത്രത്തിലെ ഫഹദിന്റെ പ്രകടനത്തെ അഭിനന്ദിച്ച് അന്താരാഷ്ട്ര മാദ്ധ്യമം. പുത്തൻ മാറ്റങ്ങൾ നടക്കുന്ന മലയാള സിനിമയുടെ നായകൻ എന്ന് കരുതപ്പെടുന്ന ഫഹദിന് വലിയൊരു മാറ്റം തന്നെ ചിത്രത്തിലൂടെ ഉണ്ടാകും. ഫഹദ് ചെയ്തിട്ടുള്ള എല്ലാ കഥാപാത്രങ്ങളും കയ്യടി അർഹിക്കുന്നതാണെന്നും ഈ മാദ്ധ്യമം റിപ്പോർട്ടിൽ പറയുന്നു. കയ്യെത്തും ദൂരത്ത് എന്ന സിനിമയിൽ അഭിനയിച്ചതുമുതലുള്ള ഫഹദിന്റെ സിനിമാ ജീവിതത്തെയും റിപ്പോർട്ടിൽ പ്രതിപാദിക്കുന്നുണ്ട്. ഫഹദ് ഫാസിലും മഹേഷ് നാരായണനും നടത്തിയ അഭിമുഖത്തിൽ ഇരുവരും പറഞ്ഞ കാര്യങ്ങളും മാദ്ധ്യമം റിപ്പോർട്ട് ചെയ്തിട്ടുണ്ട്. ആമസോൺ പ്രൈമിലൂടെ റിലീസ് ചെയ്ത ചിത്രം വലിയ നിരൂപക ശ്രദ്ധയാണ് നേടുന്നത്. സുലൈമാൻ അലിയെന്ന കേന്ദ്ര കഥാപാത്രത്തെയാണ് ഫഹദ് അവതരിപ്പിക്കുന്നത്. റോസ്‌ലിൻ എന്ന കഥാപാത്രത്തെ അവതരിപ്പിച്ച നിമിഷ സജയനും മികച്ച പ്രകടനമാണ് കാഴ്ചവച്ചത്. വിനയ് ഫോർട്ട്, ജോജു ജോർജ്, ജലജ തുടങ്ങിയവരും തങ്ങളുടെ കഥാപാത്രങ്ങളെ മികവുറ്റതാക്കിയിട്ടുണ്ട്.