ആറ്റിങ്ങൽ: ആറ്റിങ്ങൽ മുനിസിപ്പാലിറ്റിയിലെ മൂന്നാം വാർഡായ പൂവൻപാറയെ കണ്ടെയ്ൻമെന്റ് സേണായി പ്രഖ്യാപിച്ച് കർശന ലോക്ക്ഡൗൺ നിയന്ത്രണങ്ങൾ ഏർപ്പെടുത്തുമെന്ന് ജില്ലാ കളക്ടർ അറിയിച്ചു. വെള്ളിയാഴ്ച 7 പേർക്ക് കൊവിഡ് സ്ഥിരീകരിച്ചതോടെ ആറ്റിങ്ങൽ നഗരസഭാതിർത്തിയിൽ രോഗബാധിതർ 118 ആയി. 101 പേർ നിരീക്ഷണത്തിലും 9 പേർ ആശുപത്രിയിലും 8 പേർ സി.എഫ്.എൽ.ടി.സിയിലും കഴിയുകയാണ്. കണ്ടെയ്ൻമെന്റ് സോണായ പൂവൻപാറ വാർഡിൽ 14 പേർ രോഗബാധിതരാണ്. കൂടാതെ ആലംകോട്,​ ഗ്രാമം,​ തോട്ടവാരം എന്നീ വാർഡുകളിൽ പത്തു വീതവും മൂന്നുമുക്ക് വാർഡിൽ ഒമ്പതും രോഗികളുമുണ്ട്. എൽ.എം.എസ്,​ ആറാട്ടുകടവ്,​ കച്ചേരി,​ അമ്പലംമുക്ക്,​ രാമച്ചംവിള,​ കൊടുമൺ,​ പാലസ് എന്നീ വാർഡുകളിലൊഴിച്ചുള്ള എല്ലാ വാ‌ഡുകളിലും രോഗബാധിതരുണ്ട്. നഗരത്തിൽ ഇതുവരെ 53 പേരാണ് കൊവിഡ് ബാധിച്ച് മരിച്ചത്. നഗരസഭ കൊവിഡ് പ്രാഥമിക ചികിത്സാകേന്ദ്രമായ സി.എസ്.ഐയിൽ 71 പേരുണ്ട്. വെള്ളിയാഴ്ചത്തെ ടെസ്റ്റ് പോസിറ്റിവിറ്റി നിരക്ക് 14.45 ശതമാനമാണ്. ഈ ആഴ്ചയിലെ ടെസ്റ്റ് പോസിറ്റിവിറ്റി നിരക്ക് 14.5 ശതമാനമാണ്. ആറ്റിങ്ങൽ മൂന്നാഴ്ചയായി സി കാറ്റഗറിയിൽ തുടരുകയാണെന്ന് ചെയർപേഴ്സൺ അഡ്വ.എസ്.കുമാരി,​ഹെൽത്ത് സ്റ്റാൻഡിംഗ് കമ്മിറ്റി ചെയർപേഴ്സൺ രമ്യ സുധീർ എന്നിവർ പറഞ്ഞു.