പാലോട്: നന്ദിയോട് ഗവ.എൽ.പി സ്‌കൂൾ ജംഗ്ഷന് സമീപം പ്രവർത്തിച്ചിരുന്ന മോനൂസ് ഫാൻസി കത്തിനശിച്ചു.

കഴിഞ്ഞ ദിവസം രാത്രി 12ഓടെയായിരുന്നു സംഭവം. ആലംപാറ പാണ്ടിവിളാകത്ത് വീട്ടിൽ സരിതയുടെ ഉടമസ്ഥതയിലുള്ളതാണ് ഫാൻസി. കട കത്തുന്നതുകണ്ട സമീപവാസികളാണ് ആദ്യം തീ അണക്കാനെത്തിയത്. തുടർന്ന് വിതുരയിൽ നിന്നെത്തിയ ഫയർഫോഴ്സ് സംഘവും പാലോട് പൊലീസും ചേർന്ന് തീ പൂർണമായും അണച്ചു. വിരലടയാള വിദഗ്ദ്ധരും ഫോറൻസിക് അധികൃതരും സ്ഥലത്തെത്തി പരിശോധന നടത്തി. പാലോട് പൊലീസ് കേസെടുത്തു.

ഏഴുവർഷമായി സ്ഥാപനം നടത്തിയിരുന്ന സരിത പുതിയ കടയിലേക്ക് മാറിയിട്ട് നാല് മാസമേ ആയിട്ടുള്ളൂ. ഓണത്തിന് മുന്നോടിയായി പണം കടം വാങ്ങി കഴിഞ്ഞ ദിവസമാണ് കട വിപുലീകരിച്ചത്. അഞ്ചംഗ കുടുംബത്തിന്റെ ഏക വരുമാന മാർഗം ഇതോടെ പ്രതിസന്ധിയിലായി.