ചേർത്തല:ഓട്ടോക്കാസ്റ്റിൽ നിർമ്മിച്ച നാല് ട്രെയിൻ ബോഗികൾ ഇന്ന് റെയിൽവേക്ക് കൈമാറും.ഉത്തര റെയിൽവെ പഞ്ചാബ് സോണിന്റെ അമൃത്സറിലെ വർക്ക്‌ഷോപ്പിലേക്കാണ് നാല് ബോഗികളും ഒരുമിച്ച് ട്രക്കിൽ കയറ്റി റോഡ് മാർഗം അയക്കുന്നത്.10 ദിവസത്തിനുള്ളിൽ അവിടെ എത്തും.
വാഹനം ഇന്ന് രാവിലെ 10 ന് പി.പി. ചിത്തരൻ എം.എൽ.എ ഫ്ളാഗ് ഒഫ് ചെയ്യും. ഉത്തര റെയിൽവെ പഞ്ചാബ് സോണിനുള്ള ഗുഡ്‌സ് വാഗണിന് ആവശ്യമായ
5 കാസ്‌നബ് ബോഗികൾ നിർമിക്കുന്നതിന് ഓട്ടോകാസ്റ്റിന് 2020 മാർച്ചിൽ ഓർഡർ ലഭിച്ചിരുന്നു. ആദ്യ ബോഗി നിർമ്മാണം കഴിഞ്ഞ ജൂലായിൽ പൂർത്തിയാക്കി കയറ്റി അയച്ചിരുന്നു. 2 മീറ്റർ വീതിയും രണ്ടര മീറ്റർ നീളവും മുക്കാൽ മീറ്റർ ഉയരവുമാണ് ഒരു ബോഗിയ്ക്ക്. രണ്ടര ടണ്ണോളം ഭാരം വരും.4 ബോഗികളും റെയിൽവെയുടെ റിസർച്ച് ഡിസൈൻസ് ആൻഡ് സ്റ്റാൻഡേർഡ്‌സ് ഓർഗനൈസേഷൻസ് (ആർ.ഡി.എസ്) അധികൃതർ ചേർത്തല ഓട്ടോക്കാസ്റ്റിലെത്തി പരിശോധിച്ച് കയറ്റി അയക്കുന്നതിനുള്ള അന്തിമ അനുമതി നൽകി.ട്രെയിൻ ബോഗി നിർമ്മാണത്തിന് റെയിൽവെയുടെ ക്ലാസ് എ ഫൗണ്ടറി അംഗീകാരം ലഭിച്ച ഏക പൊതുമേഖലാ സ്ഥാപനമാണ് ഓട്ടോകാസ്റ്റ്.