ഹരിപ്പാട്: കൊവി​ഡും തുടർന്നുണ്ടായ പ്രശ്നങ്ങളും നടുവൊടി​ച്ച ഒരു വി​ഭാഗമാണ് മത്സ്യകർഷകർ. കുട്ടനാട്, അപ്പർ കുട്ടനാട് മേഖലയി​ലെ മത്സ്യ കർഷകരാണ് കൃഷി​യി​റക്കി​ 18 മാസം കഴി​ഞ്ഞി​ട്ടും വി​ളവെടുക്കാനാകാതെ ദുരി​തത്തി​ലായത്.

എറണാകുളം, തൃശൂർ മേഖലയി​ൽ നി​ന്നുള്ള കമ്പനി​കളാണ് കർഷകരി​ൽ നി​ന്ന് മത്സ്യം സംഭരണം നടത്തി​യി​രുന്നത്.

കൊവി​ഡ് സാഹചര്യത്തി​ൽ വി​ദേശത്തേയ്ക്കുള്ള കയറ്റുമതി​ തടസപ്പെട്ടു. ഇതാണ് ഹെക്ടർ കണക്കി​ന് പാടശേഖരങ്ങളി​ലും മറ്റു കൃഷി​ ഇറക്കി​യ കർഷകർക്ക് തി​രി​ച്ചടി​യായത്. മഴ കനക്കുന്നത് കാരണം വെള്ളം കയറ്റുന്നതി​ലെ പ്രശ്നങ്ങളും തീറ്റയുടെ ലഭ്യതകുറവും കർഷകരെ കൂടുതൽ പ്രശ്നത്തി​ലാക്കുന്നു.

കട് ല, രോഹു, ഗ്രാസ് കാർപ്പ്, മലേഷ്യൻ വാള തുടങ്ങിയ മത്സ്യങ്ങളെയാണ് സാധാരണയായി കൃഷിയിറക്കുന്നത്. കമ്പനികൾ കിലോഗ്രാമിന് 40 രൂപ മുതൽ 50 രൂപ വരെ നൽകിയാണ് സംഭരിക്കുന്നത്. ഈ വിലയിൽ വിൽപന നടത്തുമ്പോൾ തന്നെ വൻബാദ്ധ്യതകളാണ് കർഷകർക്ക് അനുഭവപ്പെടാറുള്ളത്. എന്നാൽ സബ്സിഡി തുകയാണ് കർഷകർക്ക് ആശ്വാസമായിരുന്നത്. കുറഞ്ഞ വിലയാണ് കമ്പനികൾ കർഷകർക്ക് നൽകിയിരുന്നതെങ്കിലും വ്യവസായികാടിസ്ഥാനത്തിൽ ഇറക്കുന്ന കൃഷി വിളവെടുപ്പു നടത്തിയാൽ കമ്പനികൾ മത്സ്യം ഒന്നിച്ച് സംഭരിച്ച് കൊണ്ടു പോകുന്നത് ഏറെ ആശ്വാസമായി​രുന്നു. എന്നാൽ കമ്പനികൾ മത്സ്യം സംഭരിക്കാതായതോടെ വൻകിട കർഷകർക്ക് വിളവെടുപ്പ് നടത്താൻ കഴിയാത്ത അവസ്ഥയാണ്. വിളവെടുക്കുന്ന മത്സ്യം വിറ്റഴിക്കുന്നതിന് വിപണിയില്ലാത്ത സ്ഥി​തി​. ചെറുകിട കർഷകർക്ക് പ്രാദേശികമായി ഒരു പരിധി വരെ വിറ്റഴിക്കാൻ കഴിയും.

ചേരാതെ ചെലവും വി​ലയും

സർക്കാർ സംവിധാനത്തിനു കീഴിലുള്ള ഹാച്ചറികളിൽ നിന്ന് 3 മുതൽ 8 രൂപ വരെ ഒരു മത്സ്യ കുഞ്ഞിന് വില നൽകിയാണ് സംഭരിക്കുന്നത്. ഇവയെ നഴ്സറികളി​ൽ തയ്യാറാക്കി ഒരു പ്രായമെത്തുന്നതു വരെ വളർത്തിയതിനു ശേഷമാണ് പാടശേഖരത്തിലേക്ക് തുറന്നു വിടുന്നത്. മത്സ്യത്തിന്റെ തൂക്കത്തിന്റെ 5 ശതമാനമാണ് തീറ്റ നൽകേണ്ടത്. ഒരു കിലോഗ്രാം തീറ്റയ്ക്ക് 50 രൂപയാണ് വില. ഇത്തരത്തിൽ വലിയ വില നൽകി തീറ്റ സംഭരിക്കാൻ കഴിയുന്നില്ലെന്ന് കർഷകർ പറയുന്നു. ഹോട്ടൽ വേസ്റ്റ് സുലഭമായി ലഭിച്ചിരുന്നപ്പോൾ കർഷകർക്ക് ആശ്വാസം ഉണ്ടായിരുന്നു. എന്നാൽ ഹോട്ടലുകളിലധികവും പാഴ്സലുകളായതോടെ ആ മാർഗവും അടഞ്ഞു. ഫിഷറീസ് വകുപ്പ് കർഷകർക്ക് ഹെക്ടറിന് 5000 രൂപയാണ് ആനുകൂല്യം നൽകുന്നത്. മത്സ്യകൃഷിയിലൂടെ വിളവെടുക്കുന്ന മത്സ്യങ്ങൾക്ക് താങ്ങ് വില നിശ്ചയിച്ച് സർക്കാർ തലത്തിൽ സംഭരണത്തിന് നടപടി സ്വീകരിക്കണമെന്നാണ് കർഷകരുടെ ആവശ്യം.

...........................................

>>>>>>>>>>>>

400

ഏകദേശം നാനൂറോളം

കർഷകർ ജില്ലയിൽ

മത്സ്യകർഷകരാണ് ഉള്ളത്.

>>>>>>>>>>>>>>>>>>

വെള്ളം കൂടിയതും തീറ്റയുടെ ലഭ്യത കുറവും മത്സ്യകൃഷിയെ ബാധിച്ചു. തീറ്റ ലഭിക്കാത്തതിനാൽ കച്ചവടക്കാർ പറയുന്ന കുറഞ്ഞ നിരക്കിൽ നേരത്തെ തന്നെ വിളവെടുക്കേണ്ട സ്ഥിതിയാണ്

ഉണ്ണി , കർഷകൻ

വർഷങ്ങളായി​ മത്സ്യകൃഷി​ നടത്തുന്നു. ഹെക്ടർ കണക്കിന് പാടശേഖരങ്ങളിലും കുളങ്ങളിലുമാണ് മത്സ്യകൃഷി ഇറക്കിയിട്ടുള്ളത്. ഏകദേശം നാനുറോളം കർഷകർ ജില്ലയിൽ ഇത്തരത്തിൽ മത്സ്യകൃഷി ഇറക്കിയിട്ടുണ്ട്. ഇവരൊക്കെ രൂക്ഷമായ പ്രതിസന്ധി നേരിടുകയാണ്.

ബൻസി, കർഷകൻ വീയപുരം