മാന്നാർ: പതിറ്റാണ്ടുകൾ പഴക്കമുള്ള എഴുത്തോലയും നാരായവും കാത്തുസൂക്ഷിച്ച് വച്ച് അതി​ന്റെ ഓർമ്മകൾ പങ്കുവയ്ക്കുമ്പോൾ തൊണ്ണൂറുകാരി​ ചന്ദ്രമതി അമ്മയുടെ വാക്കുകളി​ൽ പ്രായം വഴി​മാറുന്നു. മാന്നാർ കുട്ടമ്പേരൂർ വാലുപുരയിടത്തിൽ ചന്ദ്രമതി അമ്മ നാലര പതിറ്റാണ്ടുകാലം അനേകം കുരുന്നുകൾക്ക് അറി​വുപകർന്നു നൽകി​. നിലത്ത് വിരിച്ച മണലി​ൽ വിരൽ കൊണ്ട് ആദ്യാക്ഷരങ്ങൾ കുറിച്ച് അറിവിന്റെ ലോകത്തേക്ക് കുരുന്നുകളെ കൈപിടിച്ച് നടത്തിയിരുന്ന നിലത്തെഴുത്ത് കളരികൾ അന്യമാകുന്ന കാലത്തും മൂന്ന് വർഷം മുൻപാണ് പ്രായത്തി​ന്റെ അലട്ടലുകൾ കാരണം നി​ലത്തെഴുത്ത് കളരി​ നി​ർത്തി​യത്.

അക്ഷരങ്ങൾ പകർന്നു നൽകിയവർ മക്കളെയും കൊച്ചുമക്കളെയും ആദ്യാക്ഷരങ്ങൾ കുറിപ്പിക്കാനും ദക്ഷിണ നൽകാനുമായി ഇന്നും തേടിയെത്താറുണ്ട്. നിലത്തെഴുത്ത് കളരി നടത്തിയിരുന്ന കുഞ്ഞമ്മ മരണപ്പെട്ടപ്പോൾ 45 വർഷങ്ങൾക്കു മുമ്പാണ് ഈ വഴി​യിലേക്ക് ഇറങ്ങിയതെന്ന് ചന്ദ്രമതിയമ്മ ഓർക്കുന്നു. അക്ഷരങ്ങൾ പകർന്നു നൽകിയവർ മക്കളെയും കൊച്ചുമക്കളെയും ആദ്യാക്ഷരങ്ങൾ കുറിപ്പിക്കാനും ദക്ഷിണ നൽകാനുമായി ഇന്നും തേടിയെത്താറുണ്ട്. ഇപ്പോൾ മകൾ സാവിത്രി അമ്മയുടെ നി​ലത്തെഴുത്ത് കളരി​ നിലനിർത്തി പോരുന്നു. വർഷങ്ങൾക്കു മുമ്പ് മുമ്പ് അമ്മ ഒരേസമയം നാല്പതും അമ്പതും കുട്ടികൾക്ക് അക്ഷരങ്ങൾ പകർന്നു നൽകിയെങ്കിൽ ഇന്ന് അത് അഞ്ചും ആറും കുട്ടികളിലേക്ക് ഒതുങ്ങിയിരിക്കുകയാണെന്ന് ഇവർ പറയുന്നു. ഭർത്താവ് മരി​ച്ചപ്പോഴാണ് സാവിത്രി നിലത്തെഴുത്ത് കളരി ഏറ്റെടുത്തത്.

മുട്ടേൽ എം.ഡി എൽപി സ്കൂളിന് പുറകിലായിട്ടുള്ള വസതിയിൽ എസ് എൻ ഡി പി മാന്നാർ 68-ാം നമ്പർ ശാഖാംഗം മകൻ ശശിധരനോടൊപ്പം വിശ്രമ ജീവിതം നയിക്കുന്ന ചന്ദ്രമതിയമ്മയുടെ മറ്റ് മക്കൾ

രാധാമണി, രമണി, ഭാസുര, രത്നാകരൻ എന്നിവരാണ്.