മാന്നാർ: സുരേഷ് കുമാറിന്റെ (54) കരൾ മാറ്റിവയ്ക്കൽ ശസ്ത്രക്രിയയ്ക്കായി നാടൊന്നാകെ കൈകോർക്കുന്നു.

എസ് എൻ ഡി പി യോഗം മാന്നാർ യൂണിയന്റെ നേതൃത്വത്തിൽ 'കൈ കോർക്കാം സുരേഷിനായി, കരുതാം കരളിനായി' എന്ന സന്ദേശവുമായി ഞായറാഴ്ച രാവി​ലെ 11 മുതൽ ധനസമാഹരണ യജ്ഞം നടത്തുകയാണ്.

ഇരമത്തൂർ 658ാം നമ്പർ ശാഖാംഗമാണ് മാന്നാർ ഇരമത്തൂർ കടവിശേരിൽ പുത്തൻ പറമ്പിൽ സുരേഷ് കുമാർ.
യൂണിയൻ അഡ്മിനിസ്‌ട്രേറ്റീവ് കമ്മി​റ്റിയുടെ നേതൃത്വത്തിൽ ചെന്നിത്തല മേഖലയിലെ 13 ശാഖകളുടെയും ജന പ്രതിനിധികളുടെയും വിവിധ രാഷ്ട്രീയ സാമൂഹിക സാംസ്‌കാരിക സംഘടനകളുടെയും സംയുക്താഭിമുഖ്യത്തിലാണ് ശസ്ത്രക്രി​യയ്ക്കാവശ്യമായ 25 ലക്ഷം രൂപ സമാഹരിക്കുന്നത്. ലേക് ഷോർ ആശുപത്രിയിൽ ചികിത്സയിൽ കഴിയുന്ന സുരേഷിന് ഡോക്ടർമാർ അടിയന്തിര ശസ്ത്രക്രിയ നിർദ്ദേശിച്ചിരിക്കുകയാണ്. ഓട്ടോ ഡ്രൈവറായ സുരേഷിന് കരൾ പകുത്തു നൽകുന്നത് 21 കാരനായ മകനാണ്.
ഓട്ടോയി​ൽ നി​ന്നുള്ള വരുമാനമായിരുന്നു കുടുംബത്തിന്റെ ഏക ആശ്രയം. സുരേഷിന്റെ ചികിത്സക്കായി ഇപ്പോൾ തന്നെ കിടപ്പാടം വരെ പണയത്തിലായി​ വലിയൊരു തുകയുടെ ബാധ്യതയുണ്ട്. സുവർണയാണ് ഭാര്യ. അർച്ചന സുരേഷ്, അനന്തു സുരേഷ് എന്നിവരാണ് മക്കൾ. കൂട്ടായ കാരുണ്യ പ്രവർത്തനത്തിൽ എല്ലാവരും പങ്കാളികളാകണമെന്ന് സഹായ സമിതി അഭ്യർത്ഥിച്ചു.