# ബസുകളുടെ ഫിറ്റ്‌നസ് ഉറപ്പാക്കണം
ആലപ്പുഴ: ക്ലാസുകൾ ആരംഭിക്കുന്നതിന് മുന്നോടിയായി ജില്ലയിലെ സ്‌കൂളുകളിൽ നടന്നുവരുന്ന അവസാന ഘട്ട ക്രമീകരണങ്ങൾ അടിയന്തരമായി പൂർത്തീകരിക്കണമെന്ന് ജില്ലാ കളക്ടർ എ. അലക്‌സാണ്ടർ നിർദേശിച്ചു. തയ്യാറെടുപ്പുകൾ വിലയിരുത്തുകയായിരുന്നു കളക്ടർ.
സ്‌കൂളുകളിൽ സുരക്ഷിത അന്തരീക്ഷം ഉറപ്പാക്കാനുള്ള നടപടികളുടെയും ശുചീകരണത്തിന്റെയും ആദ്യഘട്ടം പൂർത്തിയായിട്ടുണ്ട്. പഞ്ചായത്ത് സെക്രട്ടറിമാർ സ്‌കൂളുകൾ സന്ദർശിച്ച് ഭൗതിക സാഹചര്യങ്ങൾ വിലയിരുത്തിവരികയാണ്. കെട്ടിടം, വാഹനങ്ങൾ, പരിസര ശുചിത്വം, അദ്ധ്യാപകരുടെയും മറ്റ് ജീവനക്കാരുടെയും വാക്‌സിനേഷൻ തുടങ്ങി വിവിധ ഘടകങ്ങൾ പരിശോധിച്ച് സാഹചര്യം സുരക്ഷിതമെന്ന് സ്ഥിരീകരിച്ച ശേഷമാണ് ക്ലാസുകൾ ആരംഭിക്കുക.
പഞ്ചായത്തുകളിൽ നിലവിൽ ലഭ്യമായ ശുചിത്വ മിഷൻ ഫണ്ട് വിനിയോഗിച്ച് ശേഷിക്കുന്ന പ്രവൃത്തികൾ പൂർത്തിയാക്കണം. ജില്ലയിലെ എല്ലാ സ്‌കൂൾ ബസുകളും പരിശോധ നടത്തി ഈ മാസം 29നുള്ളിൽ ഫിറ്റ്‌നസ് സർട്ടിഫിക്കറ്റ് വാങ്ങണം. ഉപജില്ലാതലത്തിൽ സ്‌കൂളുകളിൽ നിന്ന് ശേഖരിച്ച കുടിവെള്ള സാമ്പിളുകളുടെ പരിശോധന ഉടൻ പൂർത്തീകരിക്കണമെന്നും കളക്ടർ നിർദേശിച്ചു. സ്‌കൂൾ തുറക്കലുമായി ബന്ധപ്പെട്ട് വിവിധ വകുപ്പുകൾ ഇതുവരെ സ്വീകരിച്ച നടപടികൾ വകുപ്പ് മേധാവികൾ യോഗത്തിൽ വിശദീകരിച്ചു. ജില്ലാ വികസന കമ്മീഷണർ കെ.എസ്. അഞ്ജു, വിദ്യാഭ്യാസ ഉപഡയറക്ടർ വി.ആർ. ഷൈല, വിവിധ വകുപ്പ് ഉദ്യോഗസ്ഥർ തുടങ്ങിയവർ പങ്കെടുത്തു.