മൂവാറ്റുപുഴ: സംസ്ഥാന എക്സൈസ് വകുപ്പിന് കീഴിലെ വിമുക്തി ലഹരി വർജന മിഷനും പെരുമറ്റം വി.എം.പബ്ലിക് സ്കൂളും സംയുക്തമായി നടത്തിയ സൗജന്യ ജീവിത ശൈലി രോഗ നിർണയ ക്യാമ്പ് എക്സൈസ് സർക്കിൾ ഇൻസ്പെക്ടർ എസ്.സനിൽ ഉദ്ഘാടനം ചെയ്തു. സ്കൂൾ ചെയർമാൻ പി.എം.അമീർ അലി അദ്ധ്യക്ഷത വഹിച്ചു. വാർഡ് മെമ്പർ ടി.എം. ജലാലുദ്ദീൻ മുഖ്യപ്രഭാഷണം നടത്തി. സ്കൂൾ പ്രിൻസിപ്പൽ ഡോ.കെ.എം.അബ്ദുൾ റഷീദ് , വിമുക്തി മിഷൻ ജില്ലാ കോർഡിനേറ്റർ കെ.എ. ഫൈസൽ എന്നിവർ സംസാരിച്ചു. ക്യാമ്പിനെത്തിയവരുടെ പൊക്കം, തൂക്കം, പ്രഷർ എന്നിവ നോക്കിയ ശേഷം രക്ത- മൂത്ര പരിശോധനകളാണ് നടത്തിയത്. 153 പേരെ ക്യാമ്പിൽ പരിശോധിച്ചു. ഇതോടൊപ്പം രണ്ട് ഡോസ് കൊവിഡ് വാക്സിൻ എടുത്തവർക്ക് അവരുടെ കൊവിഡ് സർട്ടിഫിക്കറ്റ് സൗജന്യമായി എ.ടി.എം കാർഡ് രൂപത്തിലാക്കി നൽകി. ഉച്ചക്ക് 3 മണിക്ക് ശേഷം റിസൾട്ടുകൾ വിതരണം ചെയ്തു. മുത്തൂറ്റ് സ്നേഹാശ്രയയുടെ സഹകരണത്തോടെയാണ് ക്യാമ്പ് നടത്തിയത്.