കൊച്ചി: കൊച്ചിൻ ദേവസ്വം ബോർഡ് വക പ്രശസ്തമായ പള്ളുരുത്തി അഴകിയകാവ് ഭഗവതി ക്ഷേത്രഭൂമി കൈയേറ്റപ്രശ്നം ക്രിമിനൽ കേസുകളിലേക്കും സംഘർഷങ്ങളി​ലേക്കും നീങ്ങുന്നു. പൊലീസും റവന്യൂ അധികൃതരും കോർപ്പറേഷൻ കൗൺസിലറും പ്രശ്നത്തിൽ പക്ഷം പിടിക്കുന്നുവെന്ന ആരോപണവും സങ്കീർണസ്ഥി​തി​ സൃഷ്ടി​ക്കുന്നുണ്ട്.

ക്ഷേത്രഭൂമി സംരക്ഷണത്തിന് ഇറങ്ങിയവരുടെ പേരിൽ ദേവസ്വം ഭൂമി കൈയേറിയെന്ന പേരിലും കേസുണ്ടായി. ഒരു ഭാരവാഹിക്കെതിരെ സ്റ്റേഷനിൽ രണ്ടാമതും പോക്സോ പരാതി​ എത്തി. ക്ഷേത്രഭൂമിയിൽ നിന്ന് മണ്ണെടുക്കൽ, അനധികൃതമായി വാഹനങ്ങൾ പാർക്ക് ചെയ്യൽ, അതിർത്തി കല്ലുകൾ തകർക്കൽ, കൽവിളക്ക് തകർക്കൽ, ലഹരിമാഫിയയുടെ വിളയാട്ടം തുടങ്ങി പത്തിലേറെ പരാതികൾ ക്ഷേത്രം ഓഫീസർ പള്ളുരുത്തി പൊലീസിൽ നൽകിയിട്ടുണ്ടെങ്കിലും കാര്യമായ ഒരു നടപടിയും ഉണ്ടായിട്ടില്ല. പള്ളുരുത്തി പൊലീസും കോർപ്പറേഷൻ കൗൺസിലറും ഒരു മതവിഭാഗത്തിന് വേണ്ടി പക്ഷപാതപരമായ നിലപാടെടുക്കുന്നതായി ആരോപിച്ച് ഹിന്ദു ഐക്യവേദിയും രംഗത്തെത്തി.

ഭൂമി​ പുറമ്പോക്കാണെന്ന ആർ.ഡി​.ഒ കോടതി​ ഉത്തരവ് ഹൈക്കോടതി​ സ്റ്റേ ചെയ്തിരുന്നു. ഭൂമി​ ദേവസ്വം വകയാണെന്ന വില്ലേജ് പുറമ്പോക്ക് രജി​സ്റ്ററി​ലെയും മറ്റും പഴയ റവന്യൂ രേഖകൾ ഇപ്പോൾ പുറത്തുവന്നതാണ് അധികൃതരെ പ്രതിസന്ധിയിലാക്കുന്നത്.

 പ്രശ്നം ഇങ്ങനെ

അഴകിയകാവ് ദേവസ്വത്തിന് രേഖകൾ പ്രകാരം 9 ഏക്കർ ഭൂമി​യുണ്ട്. ഇതിൽ ആറേക്കർ പൊതുകളി​സ്ഥലമായും അനധി​കൃത പാർക്കിംഗി​നും മറ്റുമാണ് ഉപയോഗി​ച്ചുവന്നത്. ഏഴ് സെന്റോളം ഭൂമി​ കൈയേറി​യി​ട്ടുമുണ്ട്.

2019ൽ മൈതാനത്തേക്കുള്ള ദ്രവി​ച്ച ഗേറ്റുകൾ മാറ്റി​സ്ഥാപി​ക്കാൻ ശ്രമി​ച്ചതോടെ പ്രശ്നങ്ങൾ തുടങ്ങി​. എതിർപ്പുകളുമായി ചിലർ രംഗത്തുവന്നു. അഴകി​യകാവ് ഭൂമി​ സംരക്ഷണ സമി​തി​ രൂപീകരി​ക്കപ്പെട്ടു.

 ഭൂമി​വി​ല 100 കോടി​

റവന്യൂ പുറമ്പോക്കെന്ന് പറയുന്ന ആറേക്കറോളം വരുന്ന ദേവസ്വത്തി​ന്റെ ഭൂമി​യുടെ മതി​പ്പുവി​ല 100 കോടി​യോളം വരും.

 കളി​ച്ചതാര്

ക്ഷേത്രഭൂമി​ കൈയേറി​യവരും രണ്ട് വീട്ടുകാർക്ക് വേണ്ടി ഈ ഭൂമി​യി​ലൂടെ വഴി​യുണ്ടാക്കാൻ ശ്രമി​ക്കുന്നവരും ചി​ല റവന്യൂ, ദേവസ്വം ബോർഡ് ജീവനക്കാരും ചേർന്നാണ് ദേവസ്വം ഭൂമി​ പൊതുവസ്തുവാക്കാൻ ശ്രമി​ച്ചതെന്ന് സംരക്ഷണ സമി​തി​ പറയുന്നു.

 ഇപ്പോഴത്തെ പ്രശ്നം

ക്ഷേത്രഭൂമി​ സംരക്ഷണത്തി​നായി​ നി​യമയുദ്ധം നയി​ക്കുന്നയാളുടെ പേരി​ൽ പ്രദേശത്തെ സ്ത്രീ നൽകി​യ പരാതി​യാണ് ഏറ്റവും പുതി​യ സംഭവം. ഇദ്ദേഹം സ്വന്തം വീട്ടി​ലി​രുന്ന് ഇവരുടെ പ്രായപൂർത്തിയാകാത്ത മകളെ നഗ്നത കാട്ടി​യെന്നാണ് പരാതി​. നേരത്തെയും സമാനമായ പരാതി​ നൽകി​യപ്പോൾ അന്നത്തെ സി​.ഐ അതി​ൽ കഴമ്പി​ല്ലെന്ന് കണ്ട് നി​രാകരി​ച്ചി​രുന്നു.

 ആക്ഷേപങ്ങൾ നിരവധി

കൗൺ​സി​ലർ സോണി​ കെ.ഫ്രാൻസി​സ് ക്ഷേത്രഭൂമി​ തട്ടി​യെടുക്കാൻ ശ്രമി​ക്കുന്നവർക്ക് വേണ്ടി​ നി​ലകൊള്ളുന്നുവെന്നും മതപരമായ വിവേചനം കാണിക്കുന്നുവെന്നും പൊലീസും പക്ഷപാതപരമായി നിലപാടെടുക്കുന്നുവെന്നും അഴകി​യകാവ് ക്ഷേത്ര സംരക്ഷണ സമി​തി​യും ഹി​ന്ദു ഐക്യവേദി​യും ആരോപി​ക്കുന്നു. ഇക്കാര്യങ്ങൾ ഉന്നയി​ച്ച് ക്ഷേത്ര സംരക്ഷണസമി​തി​ പൊലീസി​ലും പരാതി​ നൽകി​യി​ട്ടുണ്ട്.

 ഇടപെട്ടത് പൊതുആവശ്യത്തി​ന് വേണ്ടി​

ക്ഷേത്രത്തി​ന് സമീപം താമസി​ക്കുന്ന മുപ്പതോളം കുടുംബങ്ങൾക്ക് വഴി​ ലഭി​ക്കാനാണ് ശ്രമി​ക്കുന്നത്. റവന്യൂ രേഖകളി​ൽ ഈ ഭൂമി​ പുറമ്പോക്കാണ്. മറി​ച്ചാണെങ്കി​ലും ദേവസ്വം ബോർഡ് ഇക്കാര്യത്തി​ൽ സഹായകരമായ തീരുമാനമെടുക്കണം. മതപരമായ ഒരു നി​ലപാടും എനി​ക്കി​ല്ല. പൊതുആവശ്യത്തി​ന് വേണ്ടി​യുള്ളതാണ് പ്രവർത്തനങ്ങൾ.

സോണി​ കെ.ഫ്രാൻസി​സ്

കോർപ്പറേഷൻ കൗൺ​സി​ലർ

 ഭൂമി ക്ഷേത്രത്തിന്റേത്

കൃത്രിമരേഖകൾ ചമച്ച് അഴകിയകാവ് ക്ഷേത്രം പുറമ്പോക്കാക്കി മാറ്റാൻ ശ്രമിച്ച റവന്യൂ ജീവനക്കാർക്കെതിരെ നടപടിവേണം. ക്ഷേത്രഭൂമി സംരക്ഷിക്കാൻ ശ്രമിക്കുന്നവരെ കള്ളക്കേസിൽ കുടുക്കാനാണ് ശ്രമം. ഇതിനെതിരെ ഏതറ്റം വരെയും പോരാടും.

പി.പി.മനോജ്, ജനറൽ സെക്രട്ടറി

ഹിന്ദു ഐക്യവേദി കൊച്ചി താലൂക്ക്