കോലഞ്ചേരി: ടൗണിൽ കട നടത്തുന്ന വൃദ്ധനെ ഭീഷണിപ്പെടുത്തി സ്വർണ മാല കവർന്ന കേസിൽ പാലക്കാട് പൂഞ്ചോല നെല്ലുവേലിൽ മനു (33) വിനെ പുത്തൻകുരിശ് പൊലീസ് അറസ്​റ്റ് ചെയ്തു. നാല് മാസം മുമ്പാണ് സാധനങ്ങൾ വാങ്ങാനെന്ന വ്യാജേന കടയിലെത്തിയ ഇയാൾ വൃദ്ധനെ കടയുടെ പിന്നിലേക്ക് കൊണ്ടുപോയി ഭീഷണിപ്പെടുത്തി മാല ഊരിയെടുത്ത് കടന്നത്. പൊലീസ് പ്രത്യേക സംഘം രൂപീകരിച്ച് അന്വേഷണം നടത്തുന്നതിനിടെ തൃശൂരിൽ നിന്നാണ് ഇയാൾ പിടിയിലായത്. വിവിധ

സ്റ്റേഷനുകളിൽ സമാന സ്വഭാവമുളള കേസുകളിലെ പ്രതിയാണ് ഇയാൾ. പൊലീസ് ഇൻസ്‌പെക്ടർ ടി. ദിലീഷ്, എസ്.ഐ.ഏലിയാസ് പോൾ, എ.എസ്.ഐ പ്രവീൺ കുമാർ, സീനിയർ സിവിൽ പൊലീസ് ഓഫീസർമാരായ ബി. ചന്ദ്രബോസ്, ഡിനിൽ തുടങ്ങിയവരാണ് അന്വേഷണ സംഘത്തിലുണ്ടായിരുന്നത്. കോടതിയിൽ ഹാജരാക്കി റിമാൻഡ് ചെയ്തു.