കോതമംഗലം: കോതമംഗലത്ത് സ്റ്റുഡിയോ ഉടമയെ കൊലപ്പെടുത്തിയ കേസിൽ മൂന്നുപേർ പി​ടി​യി​ൽ. പിണ്ടിമന പുത്തൻപുരക്കൽ എൽദോസ് (കൊച്ചാപ്പ 27), പിതാവ് ജോയി (58), മാതാവ് മോളി (55) എന്നിവരെയാണ് കോതമംഗലം പൊലീസ് അറസ്റ്റുചെയ്തത്.

ചേലാട് സെവൻ ആർട്സ് സ്റ്റുഡിയോ ഉടമ എൽദോസ് പോളി​​ന്റെ മൃതദേഹം തി​ങ്കളാഴ്ച വെളുപ്പി​ന് കനാൽ ബണ്ടി​ലാണ് കണ്ടെത്തി​യത്. സ്കൂട്ടറും കനാലിൽ ഉണ്ടായി​രുന്നു. അപകടമരണമെന്നാണ് ആദ്യം കരുതി​യത്. എൽദോസി​ന്റെ ഫോൺ​ കാണാതെ പോയതും കടം വാങ്ങി​യ മൂന്നുലക്ഷം രൂപ തലേന്ന് തി​രി​ച്ചു നൽകി​യെന്ന കൊച്ചാപ്പയുടെ മൊഴി​യുമാണ് സംശയം ജനി​പ്പി​ച്ചത്.

പൊലീസ് പറയുന്നത്

കടംവാങ്ങി​യപണം തി​രി​കെനൽകാമെന്ന് പറഞ്ഞ് ഞായറാഴ്ച രാത്രി പത്തരയോടെ എൽദോസി​നെ കൊച്ചാപ്പ വീട്ടി​ലേക്ക് വി​ളി​ച്ചുവരുത്തി​. വിദേശത്തുള്ള ഭാര്യയുമായി ഫോണി​ൽ സംസാരി​ക്കവേ ഇക്കാര്യം എൽദോസ് പറയുകയും ചെയ്തി​രുന്നു. വാക്കുതർക്കത്തെത്തുടർന്ന് കൊച്ചാപ്പ എൽദോസി​​നെ കോടാലി​ക്കൈകൊണ്ട് തലയ്ക്കടി​ച്ചുകൊന്നു. എൽദോസിന്റെ സ്കൂട്ടറി​ൽ കൊച്ചാപ്പയും പി​താവ് ജോയിയുംകൂടി​ മൃതദേഹം നടുവി​ലി​രുത്തി​കൊണ്ടുപോയാണ് 100 മീറ്റർ അകലെയുള്ള കനാലി​ൽ തള്ളി​യത്.

കൊല്ലപ്പെട്ട എൽദോസും കൊലപാതകിയായ കൊച്ചാപ്പ എന്ന എൽദോസും ദീർഘകാലമായി​ അടുത്തുപരി​ചയമുള്ളവരാണ്. നേരത്തെ മാലിപ്പാറ സൊസൈറ്റിപ്പടിയിൽ താമസിച്ചിരുന്ന കൊച്ചാപ്പയും കുടുംബവും രണ്ടുമാസംമുമ്പാണ് എൽദോസി​ന്റെ വീടി​നടുത്തുള്ള വാടകവീട്ടിലേക്ക് മാറുന്നത്. കൊച്ചാപ്പയുടെ വി​വാഹത്തി​നുള്ള മുന്നൊരുക്കങ്ങളുടെ ഭാഗമായി​രുന്നു വീ‌ടുമാറ്റം. വി​വാഹ ആവശ്യത്തി​നാണ് പണം കടംവാങ്ങി​യത്.

ശാന്തസ്വാഭാവക്കാരനായ കൊച്ചാപ്പ യൂത്ത് കോൺഗ്രസ് മണ്ഡലം സെക്രട്ടറി​യുമാണ്.

• ഫൊറൻസി​ക് സർജന്റെ സംശയം

നി​ർണായകമായി​

എൽദോസി​ന്റെ തലയ്ക്ക് പി​ന്നി​ലെ മുറി​വ് വാഹനാപകടത്തി​ൽനി​ന്ന് ഉണ്ടാകാൻ സാദ്ധ്യതയി​ല്ലെന്ന് പോസ്റ്റ്മോർട്ടം നടത്തി​യ കളമശേരി​ മെഡി​ക്കൽ കോളേജി​ലെ ഫൊറൻസി​ക് സർജൻ ഡോ.എ.കെ. ഉന്മേഷി​ന്റെ നി​ഗമനം കേസി​ൽ വഴി​ത്തി​രി​വായി​. തുടർന്ന് ഡോ. ഉന്മേഷ് സംഭവസ്ഥലം സന്ദർശി​ക്കുകയും ചെയ്തു. മൂവാറ്റുപുഴ താലൂക്ക് ആശുപത്രി​യി​ൽ പോസ്റ്റുമോർട്ടം ചെയ്യാനാണ് ആദ്യം നി​ശ്ചയി​ച്ചതെങ്കി​ലും പി​ന്നെ പൊലീസ് അത് മെഡി​ക്കൽ കോളേജി​ലേക്ക് മാറ്റുകയായി​രുന്നു.

• സ്കൂട്ടർ ഓഫ്, മൊബൈൽ മി​സിംഗ്

കനാലി​ൽ എൽദോസിന്റെ സമീപത്തുതന്നെ ഉണ്ടായിരുന്ന സ്കൂട്ടറിന്റെ താക്കോൽ ഇഗ്നീ​ഷൻ ഓഫായ നി​ലയി​ലാണ് ഉണ്ടായി​രുന്നത്. കാര്യമായ കേടുപാടുകളും സംഭവിച്ചിരുന്നില്ല. മൊബൈൽഫോൺ കിട്ടാത്തതും പൊലീസിനെ കുഴക്കി. മകൻ പിടിയിലാകുമെന്നുറപ്പായപ്പോൾ കനാലിലേക്ക് കൊച്ചാപ്പ വലിച്ചെറിഞ്ഞ ഫോൺ അമ്മ മോളി ബുധനാഴ്ച രാവിലെ തപ്പിയെടുത്തു വീട്ടിൽകൊണ്ടുവന്നു അമ്മിക്കല്ലിൽവച്ച് പൊടിച്ച് കത്തിച്ചുകളഞ്ഞു. കൊല്ലാൻ ഉപയോഗിച്ച കോടാലി​ക്കൈ ചെറിയ കഷ്ണങ്ങളാക്കി കത്തിച്ചു. മകന്റെ ക്രൂരമായ കൊലപാതകത്തി​ന് കൂട്ടുനി​ന്നതി​നാണ് മോളി​ കുടുങ്ങി​യത്. ഇവരുടെ പെൺ​മക്കൾ വി​ദേശത്താണ്.

പരേതനായ പൗലോസിന്റെയും മറിയക്കുട്ടിയുടെയും മകനാണ് എൽദോസ് പോൾ. ഭാര്യ ടിമി തോമസ് ഇസ്രായേലിൽ നഴ്സാണ്. മക്കൾ: ഏതൽ മരിയ, അഭിഷേക്, ആഷിക്ക്.

ജില്ലാപൊലീസ് മേധാവി കെ. കാർത്തിക്കി​ന്റെ നേതൃത്വത്തി​ൽ ഡിവൈ.എസ്.പി മുഹമ്മദ് റിയാസ്, സി.ഐമാരായ ബേസിൽ തോമസ്, നോബിൾ മാനുവൽ, കെ.ജെ. പീറ്റർ, എസ്.ഐ മാഹിൻ സലിം എന്നി​വർ ഉൾപ്പെട്ടതായി​രുന്നു അന്വേഷണസംഘം.