കാലടി: സംശയാസ്പദമായ സാഹചര്യത്തിൽ കണ്ട യുവാവിനെ പൊലീസ് പിടികൂടി ചോദ്യം ചെയ്തപ്പോൾ തെളിഞ്ഞത് രണ്ട് കേസുകൾ. കഴിഞ്ഞദിവസം കാലടി പൊലീസ് മഞ്ഞപ്ര ഭാഗത്ത് പട്രോളിംഗ് നടത്തുമ്പോഴാണ് കുറ്റിച്ചിറ മലയിൻമേൽ വീട്ടിൽ അരുണിനെ (22) പിടികൂടുന്നത്. ഇയാൾ ഉപയോഗിച്ചിരുന്ന ബൈക്ക് ചാലക്കുടി പാലക്ക ജംഗ്ഷന് സമീപത്തുളള വീട്ടിൽനിന്ന് മോഷ്ടിച്ചതാണെന്ന് അന്വേഷണത്തിൽ തെളിഞ്ഞു. കൂത്താട്ടുകുളം വൈക്കം കവലക്കു സമീപം സ്കൂട്ടറിന്റെ പിന്നിലിരുന്ന് യാത്ര ചെയ്യുകയായിരുന്ന സ്ത്രീയുടെ ബാഗ് തട്ടിപ്പറിച്ച് കടന്നുകളഞ്ഞതും ഇയാളും കൂട്ടാളിയും ചേർന്നാണെന്ന് പൊലീസ് പറഞ്ഞു. ബാഗിൽ ഇരുപതിനായിരം രൂപയും രണ്ടു മൊബൈൽ ഫോണും കാർഡുകളുമാണ് ഉണ്ടായിരുന്നത്. കാർഡുകളും മറ്റും കനാലിൽ ഉപക്ഷിച്ചിരുന്നു.

മോഷണവും മറ്റും തടയുന്നതിന് ജില്ലാ പൊലീസ് മേധാവി കെ. കാർത്തിക്കിന്റെ നേതൃത്വത്തിൽ പ്രത്യേകസംഘം രൂപീകരിച്ചിട്ടുണ്ട്. കാലടി ഇൻസ്പെക്ടർ ബി. സന്തോഷ്, എസ്.ഐ ജയിംസ് മാത്യു, എ.എസ് .ഐ അബ്ദുൾ സത്താർ, എസ്.സി.പി.ഒമാരായ പ്രിൻസ്, നൗഫൽ തുടങ്ങിയവരാണ് പൊലീസ് സംഘത്തിലുണ്ടായിരുന്നത്.