മൂക്കന്നൂർ: ഫെഡറൽബാങ്ക് സ്ഥാപകൻ കെ.പി. ഹോർമിസിന്റെ 104 ാമത് ജന്മദിനത്തോടനുബന്ധിച്ച് മൂക്കന്നൂർ ശാഖയുടെ ആഭിമുഖ്യത്തിൽ രണ്ടു പദ്ധതികൾ നടപ്പാക്കി. മാർ അഗസ്റ്റിൻ ഗോൾഡൺ ജൂബിലി ഹോസ്പിറ്റലിന് ഡയാലിസിസ് മെഷീൻ സംഭാവന നൽകിയ ചടങ്ങിൽ ആശുപത്രി മാനേജർ ബ്രദർ വർക്കി പൊന്നങ്കുഴി അദ്ധ്യക്ഷത വഹിച്ചു. ഫെഡറൽ ബാങ്ക് ആലുവ റീജിയണൽ മേധാവി എൽദോസ് കുട്ടി കെ.എം. മുഖ്യപ്രഭാഷണം നടത്തി. ട്രസ്റ്റി രാജു ഹോർമിസ് ചടങ്ങ് ഉദ്ഘാടനം ചെയ്തു. മൂക്കന്നൂർ പഞ്ചായത്തിലെ പാവപ്പെട്ടവർക്ക് ഡയാലിസിസ് നടത്തുന്നതിന് 50 ശതമാനം കിഴിവ് ലഭ്യമായിരിക്കുമെന്ന് ആശുപത്രി അധികൃതർ അറിയിച്ചു.

ആശുപത്രി ഡയറക്ടർ ബ്രദർ തോമസ് കറോണ്ടുകടവിൽ, മൂക്കന്നൂർ ഗ്രാമപഞ്ചായത്ത് പ്രസിഡന്റ് പോൾ പി. ജോസഫ്, കെ.പി.എച്ച്.ഇ.സി.എസ് പ്രസിഡന്റ് ടി.പി. മത്തായി തുടങ്ങിയവർ സംസാരിച്ചു.

പഞ്ചായത്തിലെ ആറു സ്‌കൂളുകളിൽനിന്ന് ഉന്നതവിജയം കൈവരിച്ച 60 വിദ്യാർഥികൾക്ക് രണ്ടരലക്ഷംരൂപ വിതരണം ചെയ്തു. കെ.പി. ഹോർമിസ് എഡ്യുക്കേഷൻ ആൻഡ് ചാരിറ്റബിൾ സൊസൈറ്റിയുടെ ആഭിമുഖ്യത്തിൽ സേക്രഡ് ഹാർട്ട് ഓർഫനേജ് ഹൈസ്‌കൂളിൽ നടന്ന ചടങ്ങിൽ ബാങ്ക് സീനിയർ മാനേജർ പി.വി. ജോർജ്, കെ.ജെ സെബാസ്റ്റ്യൻ, സേവ്യർ ഗ്രിഗറി, സോണിയ വർഗീസ്, എൻ.ഒ. പൗലോസ് തുടങ്ങിയവർ പ്രസംഗിച്ചു.