നെടുമ്പാശേരി: അത്താണി കെ.എസ്.ഇ.ബി ഓഫീസിന് സമീപം വനിതാ ഡോക്ടറുടെ വീട്ടിൽ നിന്ന് സ്വർണവും പണവും മോഷ്ടിച്ച കേസിൽ ഒരാൾ കൂടി അറസ്റ്റിൽ. തമിഴ്മാട് തേനി ടി.ടി.വി ദിനകരൻ നഗറിൽ ഭഗവതി (47) യെയാണ് ചെങ്ങമനാട് പൊലീസ് അറസ്റ്റ് ചെയ്തത്. കൂട്ടുപ്രതികളായ സുന്ദരരാജ്, ജെയ്‌സൻ എന്നിവരെ നേരത്തെ പിടികൂടിയിരുന്നു.

2019 ഫെബ്രുവരി 16ന്, തനിച്ച് താമസിക്കുന്ന ഡോക്ടറുടെ വീട്ടിൽ കയറി കൊലപ്പെടുത്തുമെന്ന് ഭീഷണിപ്പെടുത്തി 57 പവൻ സ്വർണ്ണാഭരണങ്ങളും ഒന്നര ലക്ഷത്തിന്റെ ഡയമണ്ട് നെക്ലേസും 79,000 രൂപയും കവർച്ച നടത്തിയെന്നാണ് കേസ്. ജില്ലാ പൊലീസ് മേധാവി കെ. കാർത്തിക്കിന്റെ നേതൃത്വത്തിലുള്ള പ്രത്യേക ടീം ഭഗവതിയെ കൊടുങ്ങല്ലൂരിൽ നിന്നാണ് പിടികൂടിയത്. ഇൻസ്‌പെക്ടർ എസ്.എം പ്രദീപ് കുമാർ, എസ് ഐ പി.ജെ.കുര്യാക്കോസ്, എ എസ് ഐമാരായ സിനുമോൻ, കെ.യു. ഷൈൻ തുടങ്ങിയവരും അന്വേഷണ സംഘത്തിലുണ്ട്.