കൊച്ചി: ഖാദിമേഖലയിൽ പുത്തൻ വാണിജ്യസംസ്‌കാരത്തിലൂന്നിയ മാറ്റങ്ങൾ കൊണ്ടുവരാൻ കൂട്ടായ ശ്രമങ്ങൾ നടത്തണമെന്ന് മന്ത്രി പി. രാജീവ് പറഞ്ഞു. കേരള ഖാദി വ്യവസായ ബോർഡ് സെയിൽസ് സ്റ്റാഫിനുള്ള ദ്വിദിന പരിശീലന ക്ലാസ് ഉദ്ഘാടനം ചെയ്യുകയായിരുന്നു അദ്ദേഹം. നിർമ്മാണത്തിൽ നൂതന ആശയങ്ങൾ കൊണ്ടുവരാനും ശ്രമിക്കണം. വിപണനത്തിലും മത്സരത്തിലധിഷ്ഠിതമായ മുന്നേറ്റമുണ്ടാകണം. ആധുനിക വിപണനതന്ത്രങ്ങളും കാലാനുസൃതമായ മാറ്റങ്ങളും ഈ മേഖലയിൽ ആവശ്യമാണെന്നും മന്ത്രി പറഞ്ഞു. കളമശേരി കീഡിൽ (കെ.ഐ.ഇ.ഡി) നടന്ന പരിശീലന പരിപാടിയിൽ സി.ഇ.ഒ ശരത് വി.രാജ്, കെ.കെ.വി.ഐ.ബി സെക്രട്ടറി കെ.എ. രതീഷ്, മാർക്കറ്റിംഗ് ഡയറക്ടർ ആന്റോ സെബാസ്റ്റ്യൻ എന്നിവർ പങ്കെടുത്തു. പരിശീലനത്തിൽ പങ്കെടുക്കുന്ന വില്പന കേന്ദ്രങ്ങളിലെ ജീവനക്കാർക്ക് കസ്റ്റമർ ബിഹേവിയർ ആറ്റിറ്റ്യൂഡ്, വ്യക്തിത്വവികസനം, മാർക്കറ്റിംഗ് രംഗത്തെ ആധുനിക തന്ത്രങ്ങൾ എന്നീ വിഷയങ്ങളിലാണ് പരിശീലനം.