ഇടുക്കി: സ്‌പോട്‌സ് ടൂറിസത്തെ പ്രോത്സാഹിപ്പിക്കുക എന്ന ലക്ഷ്യത്തോടെ ജില്ലാ ഭരണകൂടത്തിന്റെ ആഭിമുഖ്യത്തിൽ ജില്ലാ പൊലീസിന്റെയും ഡി.ടി.പി.സിയുടെയും വിവിധ ഏജൻസികളുടെയും സഹകരണത്തോടെ ഇടുക്കിയിൽ സംഘടിപ്പിക്കുന്ന ഹാഫ് മാരത്തൺ ഡാം ടു ഡാം റൺ തിങ്കളാഴ്ച്ച നടക്കും. ജില്ലാ വികസന കമ്മീഷണറേറ്റ്, ജില്ലാ സ്‌പോട്‌സ് കൗൺസിൽ, കെസ്ട്രൽ അഡ്വഞ്ചേഴ്‌സ്, മൂന്നാർ മാരത്തൺ എന്നിവരാണ് മറ്റ് പങ്കാളികൾ.
രാവിലെ ഏഴിന് കുളമാവ് ഡാം പരിസരത്ത് നിന്ന് ആരംഭിക്കുന്ന മാരത്തൺ ചെറുതോണി ഡാം പരിസരത്ത് സമാപിക്കും. ജില്ലാ കളക്ടർ ഷീബാ ജോർജ് മാരത്തൺ ഫ്‌ളാഗ് ഓഫ് ചെയ്യും. ചെറുതോണി ഡാം പരിസരത്ത് ചേരുന്ന സമാപന യോഗം ജലവിഭവ മന്ത്രി റോഷി അഗസ്റ്റിൻ ഉദ്ഘാടനം ചെയ്യും. ഡീൻ കുര്യാക്കോസ് എംപി, ജില്ലാ പഞ്ചായത്ത് പ്രസിഡന്റ് ജിജി കെ ഫിലിപ്പ്, ജില്ലാ പൊലീസ് മേധാവി ആർ. കറുപ്പസാമി, ജില്ലാ വികസന കമ്മീഷണർ അർജുൻ പാണ്ഡ്യൻ, ദേവികുളം സബ് കളക്ടർ രാഹുൽ കൃഷ്ണ ശർമ, ജില്ലാ സ്‌പോട്‌സ് കൗൺസിൽ പ്രസിഡന്റ് റോമിയോ സെബാസ്റ്റ്യൻ തുടങ്ങിയവർ പങ്കെടുക്കും.
21 കിലോമീറ്റർ ദൂരമാണ് ഹാഫ് മാരത്തണിൽ ഓടേണ്ടത്. ഓട്ടക്കാർക്കായി എല്ലാ സൗകര്യങ്ങളും ഒരുക്കുമെന്ന് ജില്ലാ കളക്ടർ അറിയിച്ചു.
മാരത്തണിന്റെ പ്രചാരണവുമായി ബന്ധപ്പെട്ട് തയാറാക്കിയ ലോഗോയുടെ പ്രകാശനം ജില്ലാ കളക്ടർ ഷീബാ ജോർജ് ജില്ലാ പൊലീസ് മേധാവി ആർ കറുപ്പസാമിക്കു പകർപ്പ് നൽകി നിർവഹിച്ചു. ജില്ലാ വികസന കമ്മീഷണർ അർജുൻ പാണ്ഡ്യൻ, ജില്ലാ ടൂറിസം ഡെപ്യൂട്ടി ഡയറക്ടർ ബേബി ഷീജ, ഡി.ടി.പി.സി സെക്രട്ടറി ഗിരീഷ്, ജില്ലാ സ്‌പോട്‌സ് കൗൺസിൽ പ്രസിഡന്റ് റോമിയോ സെബാസ്റ്റ്യൻ തുടങ്ങിയവർ സന്നിഹിതരായിരുന്നു.