കോടഞ്ചേരി: പൊട്ടൻകോഡ് മലയിൽ കടുവ കൊന്നു ഭക്ഷിച്ചെന്ന് സംശയിക്കുന്ന കാട്ടുപന്നിയുടെ ജഡവും പ്രദേശവും താമരശ്ശേരി ഫോറസ്റ്റ് റേഞ്ച് ഓഫീസർ എം.കെ രാജീവ് കുമാറിന്റെ നേതൃത്വത്തിലുള്ള വനപാലക സംഘം പരിശോധിച്ചു. സമീപവാസികൾ ആശങ്കപ്പെടേണ്ട കാര്യമില്ലെന്നും പന്നിയെ ഭക്ഷിച്ചത് കടുവ അല്ലെന്നും ഏതോ ചെറിയ വന്യമൃഗം ആണെന്നും എം.കെ രാജീവ് കുമാർ പറഞ്ഞു. അടിയന്തരമായി ഫോറസ്റ്റ് റാപ്പിഡ് ഫോഴ്സ് പ്രദേശങ്ങളിൽ പരിശോധന നടത്തുമെന്നും വന്യമൃഗം ഏതാണെന്ന് സ്ഥിരീകരിച്ച ശേഷമേ കൂട് സ്ഥാപിക്കുവെന്നും അദ്ദേഹം കൂട്ടിച്ചേർത്തു. ഗ്രാമ പഞ്ചായത്ത് മെമ്പർ ചാൾസ് തയ്യിൽ, നെല്ലിപ്പൊയിൽ ക്ഷീരോത്പാദക സഹകരണ സംഘം പ്രസിഡന്റ് വിൻസെന്റ് വടക്കേ മുറിയിൽ, സ്ഥലവാസികളായ സിജോ മാത്യു കരിനാട്ട്, മാരാത്ത് മാധവൻ, ബിജു ചേന്നംകുളത്ത്, ബീറ്റ് ഫോറസ്റ്റ് ഓഫീസർമാരായ ജി.എസ് സജു, പി.ജി അപർണ ആനന്ദ്, ഫോറസ്റ്റ് വാച്ചർമാരായ ബിനീഷ് രാമൻ, പി.സി ബിജു എന്നിവർ ഒപ്പമുണ്ടായിരുന്നു.