ഫറോക്ക്: ഫറോക്ക് റെയിൽവേ സ്റ്റേഷന്റെ രണ്ടാം പ്ലാറ്റ്ഫോമിലേക്കുള്ള റോഡ് ചളിയും വെള്ളവും കെട്ടി സഞ്ചാരയോഗ്യമല്ലാതായിട്ട് നാളേറെയായി​ട്ടും അധികൃതർക്ക് കുലുക്കമില്ല. റോഡിൽ 50 മീറ്ററോളം റെയിൽവേയുടെ സ്ഥലമാണ്. ഇവിടെയാണ് 20 അടിയോളം നീളത്തിൽ ചളിയും വെള്ളവും കെട്ടി നിൽക്കുന്നത്. കടലുണ്ടി, ചാലിയം, കരുവൻതിരുത്തി പ്രദേശങ്ങളിൽ നിന്നു വരുന്ന യാത്രക്കാർ രണ്ടാം പ്ലാറ്റ്ഫോമിലെത്തുവാൻ ഉപയോഗിക്കുന്ന റോഡിലാണ് ഈ അവസ്ഥ. രാത്രിയിൽ ട്രെയിൻ ഇറങ്ങി ഈ വഴി പോകുന്നവരും ബുദ്ധിമുട്ടുകയാണ്. വെളിച്ചവുമില്ല. കാറുകളും ഇരുചക്രവാഹനങ്ങളും ഈ റോഡിലൂടെയാണ് രണ്ടാം പ്ലാറ്റ്ഫോമിനടുത്ത് എത്തുന്നത്. ഈ സമയം

വാഹനങ്ങൾ ചളിയിൽ താഴ്ന്നു പോകുന്നതും സാധാരണയാണ്. മുമ്പ് നാട്ടുകാർ ചേർന്ന് വഴി നന്നാക്കിയിരുന്നു. എന്നാൽ റെയിൽവേ സ്ഥ‌ലമേറ്റെടുത്തതോടെ നാട്ടുകാർക്ക് ഈ ഭാഗം നന്നാക്കാൻ സാധിക്കാതെയായി. അതിനാൽ രണ്ടാം പ്ലാറ്റ്ഫോമിലേക്കുള്ള റോഡ് സഞ്ചാരയോഗ്യമാക്കാൻ റെയിൽവേ അധികൃതർ തന്നെ നടപടികൾ സ്വീകരിക്കണമെന്നാണ് യാത്രക്കാർ ആവശ്യപ്പെടുന്നത്.