കുന്ദമംഗലം: പെരുമണ്ണ ഗ്രാമപഞ്ചായത്തിലെ കണ്ണംചിന്നംപാലം മാമ്പുഴപ്പാലം റോഡിന് 54.6 ലക്ഷം രൂപയുടെ ഭരണാനുമതി ലഭിച്ചതായി പി.ടി.എ റഹീം എം.എൽ.എ അറിയിച്ചു. തീരദേശ റോഡുകളുടെ നിലവാരമുയർത്തൽ പദ്ധതിയിൽ ഉൾപ്പെടുത്തിയാണ് റോഡിന് തുക അനുവദിച്ചത്. മാമ്പുഴ തീരത്തുള്ള ഈ റോഡ് പ്രസിദ്ധമായ ചിറക്കൽ ക്ഷേത്ര പരിസരത്ത്കൂടിയാണ് കടന്നുപോകുന്നത്. ചിറക്കൽതാഴം കരിമ്പയിൽ ഭാഗത്തുകൂടി കണ്ടിലേരി മാമ്പുഴപ്പാലം റോഡിലേക്കാണ് ഈ പാത എത്തിച്ചേരുന്നത്. നവീകരണം പൂർത്തിയാകുന്നതോടെ കണ്ണംചിന്നം പാലത്തിൽനിന്ന് മാമ്പുഴപ്പാലത്തിനടുത്തേക്ക് എളുപ്പത്തിൽഎത്തിച്ചേരാൻ ഈ റോഡ് സഹായകമാവും.