പൊൻകുന്നം: കാഞ്ഞിരപ്പള്ളി, പൂഞ്ഞാർ അസംബ്ലി മണ്ഡലങ്ങളിൽ പി.എം.ജി.എസ്.വൈ പദ്ധതിയിൽ ഉൾപ്പെടുത്തി നിർമ്മിക്കേണ്ട റോഡുകളെ സംബന്ധിച്ചും കോട്ടയം പത്തനംതിട്ട ജില്ലകളെ തമ്മിൽ ബന്ധിപ്പിക്കുന്ന പാലത്തെ സംബന്ധിച്ചും ആന്റോ ആന്റണി എം.പി കേരള റൂറൽ റോഡ്‌സ് ഡിപ്പാർട്ട്‌മെന്റ് ഉദ്യോഗസ്ഥരുമായി ചർച്ച നടത്തി. വാഴൂർ ബ്ലോക്കിലെ കങ്ങഴ, വെള്ളാവൂർ ഗ്രാമപഞ്ചായത്തുകളിൽ കൂടി കടന്നുപോകുന്ന പ്ലാക്കൽ പടി, വെള്ളാവൂർ, നിറനാനി റോഡ് സംഘം പരിശോധിച്ചു. റോഡിന്റെ അവസാന ഭാഗത്തു നിന്നും മണിമലയാറിന് കുറുകെ പാലം നിർമ്മിച്ച് പത്തനംതിട്ട ജില്ലയിലെ കോട്ടാങ്ങൽ പഞ്ചായത്തുമായി ബന്ധിപ്പിക്കുന്നതിന് ആവശ്യമായ നടപടികൾ വേഗത്തിലാക്കണമെന്ന് എം.പി ആവശ്യപെട്ടു. പ്രളയത്തിൽ തകർന്ന ഇളംകാട് കൊടുങ്ങ റോഡും സംഘം സന്ദർശിച്ചു. കെ.എസ്.ആർ.ആർ.ഡി. സൂപ്രണ്ടിംഗ് എൻജിനീയർ അജിത്, എം പവേർഡ് ഓഫിസർ സനൽ , സംസ്ഥാന ടെക്‌നിക്കൽ ഏജൻസിയുടെ ദക്ഷിണ കേരള കോഓർഡിനേറ്റർ ഡോ. അനിൽ രഘുനാഥൻ, അസി.എൻജിനീയർമാരായ പ്രമോദ്, സുരേഷ് കുമാർ, ജിത്ത് ജോസഫ് എന്നിവർ ചർച്ചയിൽ പങ്കെടുത്തു.