കോട്ടയം : സ്‌കൂളുകൾ തുറക്കുന്നതിന്റെ ഭാഗമായി ഉദയനാപുരം ഗ്രാമപഞ്ചായത്തും, യുവജന ക്ഷേമ ബോർഡും സംയുക്തമായി നാലു സർക്കാർ സ്‌കൂളുകൾ ശുചീകരിച്ചു. പടിഞ്ഞാറേക്കര എൽ.പി സ്‌കൂൾ, ഇരുമ്പൂഴിക്കര എൽ.പി സ്‌കൂൾ, നേരേകടവ് എൽ.പി. സ്‌കൂൾ, അക്കരപ്പാടം യു.പി. സ്‌കൂൾ എന്നീ സ്‌കൂളുകളാണ് ഉദയനാപുരം യുവജന കേന്ദ്രം, യൂത്ത് ക്ലബുകൾ, യുവജനസംഘടനകൾ, സന്നദ്ധ സേനാംഗങ്ങൾ എന്നിവരുടെ നേതൃത്വത്തിൽ ശുചീകരിച്ചത്.
ഉദയനാപുരം യു.പി. സ്‌കൂൾ, വാഴമന എച്ച്.ഡബ്ലിയു.എൽ.പി. സ്‌കൂൾ എന്നിവ 15 നകം ശുചീകരിക്കും. ഉദയനാപുരം ഗ്രാമപഞ്ചായത്ത് പ്രസിഡന്റ് ഗിരിജ പുഷ്‌ക്കരൻ, വൈസ് പ്രസിഡന്റ് ടി. പ്രസാദ്, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ശ്യാമള ജിനേഷ്, ബ്ലോക്ക് പഞ്ചായത്ത്, ഗ്രാമ പഞ്ചായത്ത് അംഗങ്ങൾ, യുവജന കോ-ഓർഡിനേറ്റർ ബിനു ചന്ദ്രൻ തുടങ്ങിയവർ ശുചീകരണ പ്രവർത്തനങ്ങൾക്ക് നേതൃത്വം നൽകി.