പാലാ: മീനച്ചിൽ താലൂക്കിലെ പ്രമുഖ ക്ഷേത്രങ്ങളിൽ ഇന്നലെ പൂജവയ്പ്പ് ഭക്തിനിർഭരമായ ചടങ്ങളുകളോടെ നടന്നു. ഇന്ന് മഹാനവമി പൂജയും നാളെ വിദ്യാരംഭവും നടക്കും. പാലാ വെള്ളപ്പാട് ഭഗവതിക്ഷേത്രത്തിൽ മേൽശാന്തി സരേഷ് ആർ. പോറ്റിയുടെ മേൽനോട്ടത്തിൽ ഇന്ന് മഹാനവമി പൂജ, ഗണപതിഹോമം, ആയുധപൂജ, സരസ്വതിപൂജ എന്നിവ നടക്കും. നാളെ വിജയദശമി നാളിൽ വിദ്യാരംഭത്തിനുള്ള ഒരുക്കങ്ങളും പൂർത്തിയാക്കിയിട്ടുണ്ട്.
ഏഴാച്ചേരി കാവിൻപുറം ഉമാമഹേശ്വര ക്ഷേത്രത്തിൽ തൂലികാ പൂജ തുടങ്ങി. ഇന്ന് പ്രത്യേകം തയ്യാറാക്കിയ സരസ്വതീമണ്ഡപത്തിൽ സരസ്വതീപൂജയും തൂലികാപൂജയും നടക്കും. നാളെ രാവിലെ 7.30 ന് തൂലികാപൂജ സമാപനവും വിദ്യാരംഭവും പൂജിച്ച പേനകളുടെ പ്രസാദ വിതരണവും നടക്കും. കവിയും റിട്ട.അദ്ധ്യാപകനുമായ ആർ.കെ. വള്ളിച്ചിറ കുട്ടികളെ ആദ്യാക്ഷരം കുറിപ്പിക്കും. 8 മുതൽ ശിവഗിരി ശാരദാക്ഷേത്ര സന്നിധിയിൽ നിന്നും എത്തിച്ച് വിരിച്ച മണലിൽ പ്രായഭേദമെന്യെ ഭക്തർക്ക് പ്രാർത്ഥനാമന്ത്രങ്ങൾ എഴുതാം. പൂജകൾക്ക് മേൽശാന്തി വടക്കേൽ ഇല്ലം നാരായണൻ നമ്പൂതിരി മുഖ്യകാർമ്മികത്വം വഹിക്കും. 8.30ന് മധുരഫല മഹാനിവേദ്യസമർപ്പണവും വിതരണവും അവൽപ്രസാദവിതരണവും നടക്കും.

കെഴുവംകുളം എസ്.എൻ.ഡി.പി. ശാഖാ ഗുരദേവക്ഷേത്രത്തിൽ നാളെ രാവിലെ സരസ്വതീപൂജ, വിദ്യാരംഭം എന്നിവ നടക്കും. മേൽശാന്തി പമ്പാവാലി മഹേശ്വരൻ ശാന്തി മുഖ്യകാർമ്മികത്വം വഹിക്കും.
പാലാ അമ്പലപ്പുറത്ത് ശ്രീഭഗവതി ക്ഷേത്രത്തിൽ വിദ്യാരംഭനാളിൽ ലിപി സരസ്വതീപൂജ നടക്കും. മേൽശാന്തി പ്രദീപ് നമ്പൂതിരി നേതൃത്വം നൽകും.
അരുണാപുരം, ഊരാശാല സുബ്രഹ്മണ്യസ്വാമി ക്ഷേത്രത്തിൽ വിജയദശമി നാളിൽ രാവിലെ പ്രത്യേക പൂജകളും പ്രസാദ വിതരണവും ആദ്യക്ഷരം കുറിക്കലും നടക്കും. മലമേൽ ഇല്ലം നീലകണ്ഠൻ നമ്പൂതിരി നേതൃത്വം നൽകും.

കിടങ്ങൂർ ശിവപുരം ശ്രീമഹാദേവദേവീഗുരദേവ ക്ഷേത്രത്തിൽ നാളെ രാവിലെ 7ന് വിശേഷാൽ സരസ്വതിപൂജ, തുടർന്ന് വിദ്യാരംഭം, 8.30ന് വിശേഷാൽ ഗുരുപൂജ, 8.45ന് വിശേഷാൽ ദേവീപൂജ എന്നിവ നടക്കും.

മേവട പുറയ്ക്കാട്ടുകാവ് ദേവീക്ഷേത്രത്തിൽ നാളെ നടക്കുന്ന വിദ്യാരംഭത്തിന് മേൽശാന്തി ഏഴാച്ചേരി വടക്കേൽ ഇല്ലം എം.എൻ അനൂപ് നമ്പൂതിരി മുഖ്യകാർമ്മികത്വം വഹിക്കും.

ഐങ്കൊമ്പ് പാറേക്കാവ് ദേവീക്ഷേത്രത്തിൽ നാളെ രാവിലെ 7 മുതൽ വിശേഷാൽ പൂജകൾ, 7.30ന് വിദ്യാരംഭം, ഗാനാർച്ചന എന്നിവ നടക്കും. മേൽശാന്തി കുഴിപ്പള്ളിൽ ഇല്ലം വേണുനമ്പൂതിരി മുഖ്യകാർമ്മികത്വം വഹിക്കും.

ഇടപ്പാടി ശ്രീആനന്ദഷണ്മുഖസ്വാമി ക്ഷേത്രം, കുമ്മണ്ണൂർ നടയ്ക്കാംകുന്ന് ഭഗവതി ക്ഷേത്രം, ഏഴാച്ചേരി ഒഴയ്ക്കാട്ടുകാവ് ദേവീക്ഷേത്രം, ഐങ്കൊമ്പ് പാറേക്കാവ് ദേവീക്ഷേത്രം, അന്തീനാട് ശ്രീമഹാദേവ ക്ഷേത്രം, കിടങ്ങൂർ ശ്രീസുബ്രഹ്മണ്യസ്വാമി ക്ഷേത്രം, കിടങ്ങൂർ മഹാഗണപതി ക്ഷേത്രം, രാമപുരം ശ്രീരാമസ്വാമിക്ഷേത്രം, ഭരണങ്ങാനം ശ്രീകൃഷ്ണസ്വാമി ക്ഷേത്രം, വെള്ളിലാപ്പിള്ളി ശ്രീകാർത്യായനിദേവി ക്ഷേത്രം, പൈക ശ്രീചാമണ്ഡേശ്വരി ക്ഷേത്രം, വിളക്കുമാടം ശ്രീഭഗവതി ക്ഷേത്രം, കുറിഞ്ഞി വനദുർഗ്ഗദേവി ക്ഷേത്രം, കുറിഞ്ഞി ശ്രീകൃഷ്ണസ്വാമി ക്ഷേത്രം, ചെത്തിമറ്റം തൃക്കയിൽ മഹാദേവക്ഷേത്രം, പാലാ ളാലം മഹാദേവക്ഷേത്രം, കടപ്പാട്ടൂർ മഹാദേവക്ഷേത്രം, പയപ്പാർ ശ്രീധർമ്മശാസ്ത്രാ ക്ഷേത്രം, മുരിക്കുംപുഴ ദേവീക്ഷേത്രം തുടങ്ങിയിടങ്ങളിലെല്ലാം ഇന്ന് മഹാനവമി പൂജയും നവരാത്രി ആഘോഷ സമാപനവും നടക്കും.