കോട്ടയം: മഴക്കെടുതിയിലുണ്ടായ നാശനഷ്ടങ്ങളുടെ വിശദമായ റിപ്പോർട്ട് ഒരാഴ്ചക്കകം നൽകാൻ മന്ത്രി വി.എൻ. വാസവൻ ഉദ്യോഗസ്ഥർക്ക് നിർദേശം നൽകി. ദുരന്ത മേഖലകളിലെ പുനരധിവാസ പ്രവർത്തനങ്ങൾ വേഗത്തിലാക്കുന്നതിന്റെ ഭാഗമായി മീനച്ചിൽ താലൂക്കിൽ നടത്തേണ്ട അടിയന്തര നടപടികൾ ചർച്ച ചെയ്യുന്നതിന് കളക്ടറേറ്റിൽ ചേർന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിൽ അദ്ധ്യക്ഷത വഹിക്കുകയായിരുന്നു മന്ത്രി. ദുരന്ത സാഹചര്യത്തിൽ മാതൃകാപരമായ രീതിയിൽ രക്ഷാപ്രവർത്തനങ്ങൾ നടത്തിയ വകുപ്പുകൾ പുനരധിവാസം നടപ്പാക്കാൻ ഊർജ്ജിത നടപടിയെടുക്കണം. സർക്കാരിന്റെ വിവിധ ഫണ്ടുകൾ കാലതാമസം കൂടാതെ ലഭ്യമാക്കാനും തകർന്ന പ്രദേശങ്ങളെ പൂർവസ്ഥിതിയിലാക്കുന്നതിനും ഉദ്യോഗസ്ഥരോടൊപ്പം ജനപ്രതിനിധികളും പ്രവർത്തിക്കേണ്ടതുണ്ടെന്ന് അദ്ദേഹം പറഞ്ഞു.