മുണ്ടക്കയം: കൊക്കയാർ, പെരുവന്താനം പഞ്ചായത്തുകളിലെ പ്രളയബാധിത മേഖലയിലെ സാഹചര്യം വിലയിരുത്താനും, പുനരധിവാസവും, യാത്രാപ്രശ്‌നങ്ങൾ ഉൾപ്പെടെ പരിഹരിക്കുന്നതിനുമായി മന്ത്രി റോഷി അഗസ്റ്റിന്റെ നേതൃത്വത്തിൽ അവലോകന യോഗം ചേർന്നു.
മുണ്ടക്കയം 35 മൈലിൽ ചേർന്ന യോഗത്തിൽ വാഴൂർ സോമൻ എം.എൽ.എ ഉൾപ്പെടെയുള്ള ജനപ്രതിനിധികളും, വിവിധ വകുപ്പ് ഉദ്യോഗസ്ഥരും പങ്കെടുത്തു. പഞ്ചായത്തുകളിലെ പ്രളയബാധിത മേഖലകളിൽ സന്ദർശനം നടത്തിയ ശേഷമാണ് യോഗം ചേർന്നത്. പ്രളയത്തിനുശേഷം ഓരോ മേഖലയിലും ജനങ്ങൾ നേരിടുന്ന പ്രശ്‌നങ്ങൾ യോഗം ചർച്ച ചെയ്തു. കൊക്കയാർ പഞ്ചായത്തിൽ നാല് പാലങ്ങളും പെരുവന്താനം പഞ്ചായത്തിൽ രണ്ടു പാലങ്ങളും തകർന്നു. റോഡുകൾ തകർന്ന് പല മേഖലകളും ഒറ്റപ്പെട്ടിരിക്കുകയാണ്. സ്‌കൂൾ തുറക്കുമ്പോൾ കുട്ടികളുടെ യാത്ര, പഠനം എന്നിവയ്ക്ക് ഇതു കടുത്ത വെല്ലുവിളിയാകും.അതിനാൽ ഇത്തരം പ്രശ്‌നങ്ങൾക്ക് അടിയന്തര പ്രധാന്യം നൽകുമെന്നും മന്ത്രി പറഞ്ഞു